У Магілёўскім архіве «ажывілі» лісты вайны ў рамках ваенна-патрыятычнага праекта

27 чэрвеня ва ўстанове «Дзяржаўны архіў Магілёўскай вобласці» адбылася прэзентацыя культурна-адукацыйнага праекта «З гонарам аб горадзе: ажыўшыя лісты вайны», прысвечанага Дню горада Магілёва і 80-годдзю Перамогі ў Вялікай Айчыннай вайне. Мерапрыемства прайшло ў рамках рэалізацыі адукацыйнага праекта «Архівы – Школе», накіраванага на ваенна-патрыятычнае выхаванне моладзі і ўвекавечанне памяці гераічнага мінулага беларускага народа. У мерапрыемстве прынялі ўдзел навучэнцы – удзельнікі творчых калектываў установы адукацыі «Магілёўскі дзяржаўны каледж мастацтваў»: тэатра «Атмасфера», тэатра-студыі «Драма.АРТ», арт-студыі «АКНО», вакальнага ансамбля «Паветраныя», а таксама прадстаўнікі галоўнага ўпраўлення юстыцыі Магілёўскага аблвыканкама і яго структурных падраздзяленняў. Юныя таленты сваімі выступленнямі «ажывілі» ваенныя пісьмы з фондаў асабістага паходжання, якія захоўваюцца ў архіве. Праз песні, у якіх жыве памяць аб тых суровых і нялёгкіх днях, і праз мастацкія творы, дзе лічбавыя копіі лістоў сталі асновай для стварэння карцін, навучэнцы змаглі данесці да гледачоў усю глыбіню пачуццяў і перажыванняў, захаваных у гэтых гістарычных дакументах. Лісты ваенных гадоў – гэта не проста архіўныя дакументы. Гэта доўгачаканыя вестачкі з фронту ці з дому, адзіная сувязная нітка паміж блізкімі людзьмі, надзея на жыццё і набліжэнне Вялікай Перамогі. Унікальны фармат мерапрыемства дазволіў маладым удзельнікам і гасцям дакрануцца да гісторыі, адчуць сувязь часоў і ўсвядоміць каштоўнасць міру і свабоды. Праект «З гонарам аб горадзе: ажыўшыя лісты вайны» стаў яркім прыкладам эфектыўнага выкарыстання архіўных матэрыялаў у мэтах ваенна-патрыятычнага выхавання падрастаючага пакалення.

1. Ваенныя лісты з фондаў асабістага паходжання.

2. Прэзентацыя франтавых лістоў навучэнцамі каледжа.

3. Прадстаўнікі галоўнага ўпраўлення юстыцыі Магілёўскага аблвыканкама, калектыў архіва падчас мерапрыемства.

4-7. Выступленні навучэнцаў каледжа.

8. Дырэктар установы «Дзяржаўны архіў Магілёўскай вобласці» Святлана Шараева ўручае падзяку прадстаўніку ўстановы адукацыі «Магілёўскі дзяржаўны каледж мастацтваў».

9-10. Экспазіцыя мастацкіх работ навучэнцаў каледжа.

11-12. Калектыўнае фота ўдзельнікаў мерапрыемства.