Да 125-годдзя паэта, драматурга, перакладчыка, педагога Міхаіла Дуброўскага (1897-1983)

Апублікавана: 3 кастрычніка 2022 г.

Міхаіл Георгіевіч Дуброўскі (сапр. Маслакоў) нарадзіўся 3 кастрычніка 1897 г. у в. Казелле Чэрыкаўскага павета Магілёўскай губерніі (цяпер Краснапольскі раён Магілёўскай вобласці).

Скончыў Вышэйшы літаратурна-мастацкі інстытут імя В. Я. Брусава ў Маскве (1925). У 1925-1926 гг. – навуковы супрацоўнік літаратурнай камісіі Інбелкульта. З 1926 г. да 1941 г. жыў пераважна ў Маскве. Працаваў у рэдакцыі газеты «Гудок», літаратурным рэдактарам ва Усесаюзным радыёкамітэце і ў выдавецтве. У 1937-1941 гг. настаўнічаў у сярэдняй школе і адначасова займаўся ў аспірантуры Інстытута філасофіі, літаратуры і гісторыі імя М. Г. Чарнышэўскага.

У пачатку Вялікай Айчыннай вайны эвакуіраваўся ў Башкірыю, дзе працаваў выкладчыкам у педвучылішчы. У сакавіку 1942 г. прызваны ў армію, але ў ліпені таго ж года дэмабілізаваны. Да 1945 г. знаходзіўся на педагагічнай рабоце ў Маскоўскай вобласці і ў Маскве.

Пасля вайны ў розныя гады працаваў загадчыкам кафедры беларускай літаратуры і мовы Брэсцкага педагагічнага інстытута, выкладчыкам сярэдняй школы ў Маскве, старшым выкладчыкам Гродзенскага педагагічнага інстытута. З 1960 г. на пенсіі.

Першыя вершы М. Дуброўскага былі надрукаваны ў 1918 г. у газеце «Известия Климовичского уисполкома». Аўтар вершаў, баек, артыкулаў, апавяданняў, крытычных артыкулаў і нарысаў. Напісаў лібрэта «Уласнай рукой» (разам з П. Шастаковым) да оперы М. Чуркіна «Вызваленне працы». Шмат гадоў аддаў даследаванню сатырычнага напрамку ў беларускай літаратуры, вывучэнню творчасці народнага пісьменніка Беларусі К. Крапівы. Займаўся перакладамі з англійскай, італьянскай, нямецкай, рускай і іншых моў на беларускую.

Памёр 11 верасня 1983 г.

У Беларускім дзяржаўным архіве-музеі літаратуры і мастацтва захоўваецца асабісты фонд М. Дуброўскага (Ф. 357), які налічвае каля 600 дакументаў: вершы, вершаваныя апавяданні, байкі, пераклады, перапіска, дакументы да біяграфіі, фатаграфіі.

1. М. Дуброўскі. 1970-я гг.
БДАМЛМ. Ф. 357. Воп. 1. Адз. зах. 85. Л. 1.

2. Аўтабіяграфія М. Дуброўскага. Аўтарызаваны машынапіс. 20 кастрычніка 1980 г.
БДАМЛМ. Ф. 357. Воп. 1. Адз. зах. 77. Л. 1.

3. М. Дуброўскі з Р. Няхаям, М. Хрысцічам, М. Чарняевым і інш. у Брэсцкім педінстытуце. 1946 г.
БДАМЛМ. Ф. 88. Воп. 3. Адз. зах. 497. Л. 2.

4. М. Дуброўскі. Верш “Лотас і хваля. Памяці Янкі Купалы”. Аўтарызаваны машынапіс. 1979 г.
БДАМЛМ. Ф. 357. Воп. 1. Адз. зах. 5. Л. 10.

5. М. Дуброўскі. Санет “К вершинам”. Аўтарызаваны машынапіс. 1980 г.
БДАМЛМ. Ф. 357. Воп. 1. Адз. зах. 5. Л. 22.

6. М. Дуброўскі. Байкі “Гаспадар і курыца” і “Крот, грак і ласка”. Выразкі з газет. 1969-1970 гг.
БДАМЛМ. Ф. 357. Воп. 1. Адз. зах. 10. Лл. 12, 13.

7. М. Дуброўскі, П. Шастакоў. Лібрэта оперы М. Чуркіна “Вызваленне працы”. Машынапіс. 1955 г.
БДАМЛМ. Ф. 357. Воп. 1. Адз. зах. 13. Лл. 1-2.

8. В. Шэкспір. Камедыя “Віндзорскія жартаўніцы” ў перакладзе М. Дуброўскага з англійскай мовы. Аўтарызаваны машынапіс з праўкай. 1973 г.
БДАМЛМ. Ф. 357. Воп. 1. Адз. зах. 18. Лл. 1, 3.