Выставы Нацыянальнага архіва Рэспублікі Беларусь адчынiлiся на Беларускім юрыдычным форуме

Апублікавана: 5 снежня 2025 г.

4 і 5 снежня 2025 года Грамадскае аб’яднанне «Беларускі рэспубліканскі саюз юрыстаў» сумесна з Міністэрствам юстыцыі Рэспублікі Беларусь, Нацыянальным цэнтрам заканадаўства і прававой інфармацыі, Нацыянальным цэнтрам абароны персанальных даных і ТАА «ЮрСпектр» праводзiлi Беларускі юрыдычны форум «Права ў сучасным свеце».

У рамках дадзенага мерапрыемства Нацыянальны архіў Рэспублікі Беларусь (далей – НАРБ) падрыхтаваў дакументальную выставу аб нарматворчай дзейнасці. Таксама на форуме была прадстаўлена банэрная выстава «Адновім Беларусь разам!».

На выставе НАРБ прадставіў архіўныя дакументы: Даручэнні Прэзідыума Вярхоўнага Савета і Савета Міністраў БССР аб падрыхтоўцы праектаў заканадаўчых актаў; прапановы і заключэнні па ўдасканаленні заканадаўства; дакументы аб падрыхтоўцы міністэрствамі праектаў заканадаўчых і нарматыўных актаў; заключэнне Галоўнага экспертна-прававога ўпраўлення Сакратарыята Савета Рэспублікі па праекце Закона Рэспублікі Беларусь аб унясенні змяненняў і дапаўненняў у некаторыя законы Рэспублікі Беларусь па пытаннях нарматворчай дзейнасці; загад Нацыянальнага цэнтра прававой інфармацыі Рэспублікі Беларусь аб выданні Нацыянальнага рэестра прававых актаў Рэспублікі Беларусь, і іншыя.

З тэматычнай выставай з цiкавасцю азнаёмілiся ўдзельнікі форума.