Аб правядзенні Дзяржаўным архівам Гомельскай вобласці мерапрыемства для навучэнцаў устаноў адукацыі г.Гомеля на базе атрада міліцыі асаблівага прызначэння

Апублікавана: 5 снежня 2025 г.

27 лістапада 2025 г. дырэктар Дзяржаўнага архіва Гомельскай вобласці Юрый Шастапалаў арганізаваў прафарыентацыйную экскурсію для навучэнцаў старэйшых класаў ДУА «Сярэдняя школа №75 г.Гомеля» і ДУА «Гомельскае кадэцкае вучылішча» ў Атрад міліцыі асаблівага прызначэння. У мерапрыемстве таксама прынялі ўдзел прадстаўнікі КПБ і гомельскіх архіваў.

Супрацоўнікі атрада міліцыі асаблівага прызначэння (АМАП) расказалі навучэнцам пра тое, што АМАП – гэта падраздзяленне спецыяльнага прызначэння органаў унутраных спраў Рэспублікі Беларусь. АМАП уваходзіць у склад міліцыі грамадскай бяспекі і выконвае спецыяльныя задачы, якія адносяцца да кампетэнцыі органаў унутраных спраў. У першую чаргу – гэта забеспячэнне асабістай і грамадскай бяспекі грамадзян, аператыўнае рэагаванне і спыненне парушэнняў грамадскага парадку падчас масавых мерапрыемстваў, затрыманне асоб, якія аказваюць узброенае супраціўленне і г.д. Навучэнцам была паказана тэхніка, якая выкарыстоўваецца ў паўсядзённым нясенні службы і ў баявых аперацыях. Навучэнцы кадэцкага ліцэя і старэйшакласнікі з захапленнем разглядалі баявую зброю, якую прадэманстравалі супрацоўнікі спецпадраздзялення.

Таксама быў паказаны цір і спортзал, дзе адточваецца навык валодання зброяй і падтрымліваецца выдатная фізічная падрыхтоўка.

Спецыялісты адказалі на пытанні навучэнцаў пра тое, як трапіць у шэрагі падраздзялення.

– Перш за ўсё, разглядаем хлопцаў, якія прайшлі тэрміновую службу. Перавага аддаецца байцам унутраных войскаў, спецназаўцам, дэсантнікам, памежнікам. Галоўнае – стан здароўя, маральна-волевыя якасці, узровень фізічнай падрыхтоўкі. І, вядома ж, гатоўнасць працаваць часам у экстрэмальных умовах.

У заключэнне мерапрыемства ўдзельнікам паказалі дакументальны фільм пра працу падраздзялення спецыяльнага прызначэння ў Гомелі.