Адкрыццё банэрнай выставы «Манументы Неўміручасці» ў занальным дзяржаўным архіве ў г.Кобрыне

8 мая 2026 г. у занальным дзяржаўным архіве ў г.Кобрыне расчыніла свае дзверы банэрная выстава пад назвай «Манументы Неўміручасці». Гэтая экспазіцыя прысвечана ўвекавечанню памяці аб подзвігах і ахвярах Вялікай Айчыннай вайны на тэрыторыі трох раёнаў, якія ўваходзяць у зону абслугоўвання архіва: Бярозаўскага, Кобрынскага і Пружанскага.

На выставе прадстаўлены архіўныя дакументы з фондаў раённых і гарадскіх органаў улады. Гэтыя дакументы распавядаюць пра тое, як на працягу многіх гадоў вялася праца па добраўпарадкаванні брацкіх магіл савецкіх воінаў і партызан, а таксама месцаў масавага знішчэння мірнага насельніцтва. Дакументы адлюстроўваюць клопат аб захаванні памяці, імкненне ўвекавечыць подзвігі герояў і нагадаць аб трагічных старонках гісторыі.

Асаблівае месца ў экспазіцыі займаюць фатаграфіі манументаў, якія былі сабраны з адкрытых інтэрнэт-крыніц. Гэтыя здымкі дазваляюць наведвальнікам убачыць на свае вочы помнікі, узведзеныя ў гонар загінуўшых, і адчуць значнасць іх захавання.

Выстава «Манументы Неўміручасці» – гэта не проста дэманстрацыя гістарычных дакументаў, гэта даніна павагі тым, хто аддаў свае жыцці за мірнае неба, і напамін пра важнасць захавання гістарычнай памяці для будучых пакаленняў.

На фота: Банэрная выстава «Манументы Неўміручасці»