Прэзентацыя «Беларускага архіва старажытных грамат»

15 сакавіка 2025 года на XXXII Мінскай міжнароднай кніжнай выставе-кірмашы адбылася прэзентацыя двухтомнага выдання «Беларускі архіў старажытных грамат», сумеснага праекта Беларускага дзяржаўнага архіва-музея літаратуры і мастацтва (далей — БДАМЛМ) і Нацыянальнай бібліятэкі Беларусі.

«Беларускі архіў старажытных грамат» – першы археаграфічны збор дакументаў па гісторыі Беларусі XVI-XVIII стагоддзяў. Яго складальнікам быў беларускі гісторык і археограф Іван Іванавіч Грыгаровіч (1792-1852). Першая частка зборніка была ўпершыню апублікавана ў 1824 годзе на грошы вядомага мецэната, графа М.П.Румянцава. Выданне 2025 года дадзенай часткі з’яўляецца рэпрынтным. Другая частка збору ў рукапісным выглядзе захоўваецца ў БДАМЛМ і сёлета яна ўпершыню набыла кніжную форму – факсімільную.

На галоўнай сцэне цэнтральнага экспанента выставы-кірмашу выступілі дырэктар БДАМЛМ А.А.Макаранка, прафесар кафедры крыніцазнаўства гістарычнага факультэта БДУ М.Ф.Шумейка, загадчык кафедры царкоўнай гісторыі і царкоўна-практычных дысцыплін Мінскай духоўнай акадэміі, прафесар В.А.Цяплова.

У сваім выступленні А.А.Макаранка падкрэсліла значнасць гэтага праекта для беларускай арэаграфіі, крыніцазнаўства і наогул для гісторыі Беларусі. Асаблівая ўвага была нададзена другому тому «Беларускага архіва старажытных грамат», упершыню апублікаванаму праз 200 гадоў пасля яго падрыхтоўкі І.І.Грыгаровічам.

Прафесар М.Ф.Шумейка распавёў пра гісторыю падрыхтоўкі дадзенага зборніка дакументаў, пра яго перадачу на захоўванне ў БДАМЛМ. Прафесар В.А.Цяплова больш дэталёва пазнаёміла слухачоў з біяграфіяй І.І.Грыгаровіча і яго ўкладам у вывучэнне гісторыі праваслаўнай царквы на Беларусі.

Мэта выдання Беларускага дзяржаўнага архіва старажытных грамат – рэалізаваць першапачатковую задуму І.І.Грыгаровіча і палегчыць доступ сучасных даследчыкаў да сабраных ім унікальных дакументаў.

Больш падрабязна з выступленнем А.А.Макаранка можна пазнаёміцца па спасылцы.

1. Прэзентацыя двухтомнага выдання «Беларускі архіў старажытных грамат» на XXXII Мінскай міжнароднай кніжнай выставе-кірмашы

2. Дырэктар БДАМЛМ А.А.Макаранка падчас прэзентацыі «Беларускага архіва старажытных грамат»

3. Выступленне прафесара М.Ф.Шумейкі

4. Выступленне прафесара В.А.Цяпловай