Аб адкрыцці ў Музеі сучаснай беларускай дзяржаўнасці часовай экспазіцыі, прымеркаванай да Дня Канстытуцыі Рэспублікі Беларусь
13 сакавіка 2023 года Нацыянальны архіў Рэспублікі Беларусь сумесна з Музеем сучаснай беларускай дзяржаўнасці адкрыў часовую экспазіцыю «Канстытуцыя — галоўны дакумент краіны», прымеркаваную да Дня Канстытуцыі Рэспублікі Беларусь.
2022 год быў знакавым для нашай краіны: 27 лютага адбыўся рэспубліканскі рэферэндум па пытанні ўнясення змяненняў і дапаўненняў у Канстытуцыю Рэспублікі Беларусь. За прыняцце рашэння па вынесеным на рэферэндум пытанні прагаласавала 82,86% грамадзян, гэта значыць большасць грамадзян, унесеных у спісы для галасавання.
Канстытуцыя — асноўны закон дзяржавы. Да ліку галоўных прынцыпаў, якія пранізваюць нормы Канстытуцыі, трэба аднесці: вяршэнства права, гарантыю і захаванне правоў чалавека і грамадзяніна, дэмакратычны парадак фарміравання органаў улады. Канстытуцыя ўвасобіла ў сабе гістарычны досвед станаўлення беларускай дзяржаўнасці. Яна грунтуецца на неад’емным суверэнным праве беларускага народа самастойна вызначаць свой лёс і быць паўнапраўным суб’ектам сусветнай супольнасці.
Выстава «Канстытуцыя — галоўны дакумент краіны» адлюстроўвае храналогію станаўлення канстытуцыйных асноў у Беларусі, расказвае пра ход падрыхтоўкі і прыняцця Канстытуцыі 1994 года, унясенне ў яе змяненняў і дапаўненняў у сувязі з імкліва змяняючыміся палітычнымі, сацыяльна-эканамічнымі і культурнымі рэаліямі.
У экспазіцыі Нацыянальны архіў Рэспублікі Беларусь прадставіў арыгінальны экзэмпляр Канстытуцыі Рэспублікі Беларусь, пратакол Цэнтральнай Камісіі Рэспублікі Беларусь па выбарах і правядзенні рэспубліканскіх рэферэндумаў з вынікамі галасавання па кожным пытанні і іншыя дакументы. Таксама на выставе можна азнаёміцца з друкаванымі выданнямі са збору Прэзідэнцкай бібліятэкі Рэспублікі Беларусь і матэрыялаў з фондаў Нацыянальнага гістарычнага музея Рэспублікі Беларусь. Выстава падрабязна раскрывае асноўныя палажэнні дзеючай Канстытуцыі Рэспублікі Беларусь, яе ролю і месца ў сістэме дзяржаўнага ладу краіны.
