БДАМЛМ прэзентаваў выставу «Быў. Ёсць. Буду.» у Міністэрстве юстыцыі

23 снежня 2025 года Беларускі дзяржаўны архіў-музей літаратуры і мастацтва (далей – БДАМЛМ) прадставіў літаратурна-дакументальную выставу «Быў. Ёсць. Буду.», прымеркаваную да юбілейнай даты – 95-годдзя з дня нараджэння прызнанага класіка беларускай літаратуры Уладзіміра Сямёнавіча Караткевіча. Прэзентацыя адбылася ў Міністэрстве юстыцыі Рэспублікі Беларусь.

З прывітальным словам да прысутных звярнулася дырэктар архіва-музея Алена Аляксандраўна Макаранка, падкрэсліўшы неацэнную значнасць спадчыны Уладзіміра Караткевіча для нацыянальнай культуры і важнасць яе захавання для будучых пакаленняў.

Прадставіла выставу вядучы архівіст БДАМЛМ Наталля Аляксандраўна Мізон. Яна пазнаёміла прысутных з дакументамі, якія экспануюцца, сярод якіх як афіцыйныя дакументы (пратаколы, лісты, анкеты, якія рэгламентуюць і фіксуюць жыццё чалавека ў грамадстве), так і творчыя матэрыялы – унікальныя рукапісы вершаў і раманаў, лісты да калег, а таксама фатаграфіі Уладзіміра Караткевіча.

Куратар выставы акцэнтавала ўвагу работнікаў Міністэрства юстыцыі на ўнікальнасць асобы У.Караткевіча і праявы яе ў дакументальнай спадчыне: акуратны почырк, творчая манера звароту ў лістах да калег і сяброў, шматлікія малюнкі на палях, гумарыстычныя подпісы на фотаздымках і інш. Прадстаўленыя дакументы падсвятлялі шматграннасць творчай натуры пісьменніка і выклікалі цікавасць з боку публікі.

1. Дырэктар БДАМЛ А.А.Макаранка

2. Вядучы архівіст Н.А.Мізон

3. Падчас прэзентацыі выставы «Быў. Есць. Буду».

4. Падчас знаёмства з выставай