Удзел БДАМЛМ у міжнародным комплексным мерапрыемстве ў Музеі Якуба Коласа
31 жніўня 2026 года дырэктар Беларускага дзяржаўнага архіва-музея літаратуры і мастацтва (далей – БДАМЛМ) А.А.Макаранка прыняла ўдзел у маштабным міжнародным комплексным мерапрыемстве, якое адбылося ў Дзяржаўным літаратурна-мемарыяльным музеі Якуба Коласа. Поліфарматная праграма аб’яднала тры значныя культурныя падзеі: прэзентацыю факсімільнага выдання працы народнага паэта Беларусі Якуба Коласа «Методыка роднай мовы», навукова-практычны круглы стол «Пра галоўнае: Колас, слова і мова» і ўрачыстае адкрыццё часовай міжнароднай экспазіцыі «Было іх двое ў пятай роце».
Цэнтральнай часткай урачыстасці стала прэзентацыя ўнікальнага факсімільнага аднаўлення першага метадычнага дапаможніка Якуба Коласа 1920-х гадоў, у якім класік выклаў сваё бачанне навучання дзяцей роднай мове і прывіцця любові да літаратуры – думкі, якія застаюцца надзвычай актуальнымі і для сучаснай адукацыйнай прасторы. Працягам праграмы стала праца круглага стала, дзе прадстаўнікі архіўнай і музейнай супольнасцей, навукоўцы, настаўнікі і бібліятэкары абмеркавалі пытанні пераадолення хрэстаматыйных стэрэатыпаў у выкладанні літаратуры, стварэння новых інтэрактыўных фарматаў працы з тэкстамі і пабудовы бесперапыннага адукацыйнага маршруту «школа – музей – бібліятэка». Яскравым фіналам мерапрыемства стала адкрыццё выставачнага праекта «Было іх двое ў пятай роце», падрыхтаванага супольна з Дзяржаўным музеем-запаведнікам М.А.Шолахава «Ціхі Дон» і прысвечанага адлюстраванню падзей Першай сусветнай вайны ў творчасці Якуба Коласа і Міхаіла Шолахава. Удзел кіраўніцтва БДАМЛМ у падобных міжнародных інтэграцыйных праектах падкрэслівае важную ролю архіва-музея ў справе захавання, вывучэння і актуалізацыі нацыянальнай гісторыка-культурнай спадчыны.
Тэлевізійны рэпартаж пра падзею падрыхтаваны тэлеканалам АНТ.
 |
| 1. А.А.Макаранка, І.Р.Князева, В.Г.Пархімовіч падчас прэзентацыі факсімільнага выдання Якуба Коласа «Методыка роднай мовы» |
 |
| 2. Выступленне В.Г.Пархімовіч |
 |
| 3. Падчас правядзення круглага стала «Пра галоўнае: Колас, слова і мова» |
 |
| 4. Выступленне Труса М.В. |
 |
| 5. Прэзентацыя выставачнага праекта «Было іх двое ў пятай роце» |