У БДАМЛМ прайшоў Дзень адчыненых дзвярэй для будучых абітурыентаў

4 чэрвеня 2026 года ў рамках рэспубліканскай акцыі «Архівы – школе» ў Беларускім дзяржаўным архіве-музеі літаратуры і мастацтва (далей – БДАМЛМ) адбыўся Дзень адчыненых дзвярэй, арыентаваны на навучэнцаў старэйшых класаў.

Сустрэча была арганізавана з мэтай папулярызацыі архіўнай справы, знаёмства моладзі з асаблівасцямі працы з дакументальнай спадчынай і прыцягнення ўвагі будучых абітурыентаў да прафесіі архівіста.

Загадчыца аддзела інфармацыі, публікацыі і выкарыстання дакументаў Вера Валянцінаўна Біруля распавяла навучэнцам пра ўнікальнасць фондаў архіва-музея, спецыфіку захоўвання дакументаў. Удзельнікі сустрэчы змаглі даведацца аб асноўных напрамках дзейнасці БДАМЛМ, атрымалі адказы на пытанні аб перспектыве працаўладкавання ў архіўныя ўстановы.

У чытальнай зале архіва-музея для ўдзельнікаў Дня адчыненых дзвярэй была арганізавана экскурсія па актуальных выставах «Яго багаты плён» (да 140-годдзя пісьменніка Змітрака Бядулі) і «Горнымі дарогамі. Каўказ» (да 100-годдзя мастака Барыса Аракчэева).

Падобныя мерапрыемствы спрыяюць не толькі пашырэнню кругагляду будучых абітурыентаў, але і дапамагаюць ім зрабіць усвядомлены выбар на карысць гуманітарных спецыяльнасцяў, звязаных з архіўнай працай і музейнай справай.

1. Экскурсія ў чытальнай зале БДАМЛМ

2. Знаёмства з выставай «Горнымі дарогамі. Каўказ»

3. В.В.Біруля распавядае пра працу архівістаў

4. Знаёмства з выставай «Яго багаты плён»

5. Удзельнікі Дня адчыненых дзвярэй у БДАМЛМ