Выстава дакументаў Нацыянальнага архіва Рэспублiкi Беларусь ў Палацы Рэспублікі, прысвечаная Дню міліцыі

Апублікавана: 5 сакавіка 2025 г.

4 сакавіка 2025 г. у Рэспубліцы Беларусь адзначаўся Дзень міліцыі.

У рамках святкавання гэтай знамянальнай даты Нацыянальны архіў Рэспублікі Беларусь (далей – НАРБ) прадставіў дакументальную выставу і дзве банэрныя выставы – «Край мужнасці і славы» і «Выстаялі і перамаглі».

Удзел ва ўрачыстым сходзе прынялі члены ўрада, дэпутаты Палаты прадстаўнікоў і Нацыянальнага сходу Рэспублікі Беларусь, дыпламаты, акрэдытаваныя ў Беларусі, супрацоўнікі Міністэрства ўнутраных спраў і шматлікія госці.

У гады Вялікай Айчыннай вайны супрацоўнікі органаў міліцыі, як і ўвесь беларускі народ, сталі на барацьбу з нямецка-фашысцкімі захопнікамі. Спецгрупы НКУС і НГБ, партызанскія атрады, створаныя і ўзначаленыя супрацоўнікамі міліцыі, мужна і гераічна змагаліся на акупаванай тэрыторыі Беларусі супраць нямецка-фашысцкіх захопнікаў. Радзіма высока ацаніла мужнасць, адвагу і гераізм міліцыянтаў, многія з якіх былі ўзнагароджаны высокімі ўрадавымі ўзнагародамі.

Сярод дакументаў НАРБ, прадстаўленых на выставе – спісы работнікаў НКУС, якія знаходзяцца ў партызанскіх атрадах Беларусі; справаздачны даклад аб рабоце партарганізацыі ўпраўлення міліцыі НКУС БССР; загады і звесткі аб баявых дзеяннях партызанскіх атрадаў; узнагародныя і асабістыя лісты на партызан–міліцыянтаў, іншыя дакументы.

У пасляваенны перыяд беларуская міліцыя адыграла важную ролю ў забеспячэнні мірнага жыцця нашага народа: ліквідавала розныя бандыцкія падпольныя групоўкі, змагалася са злачыннасцю, удзельнічала ў размініраванні тэрыторыі Беларусі, стварала і брала шэфства над дзіцячымі дамамі для дзяцей-сірот і дзяцей, якія засталіся без бацькоў, і іншае.

Дакументы НАРБ выклікалі непадробную цікавасць і ўвагу, як супрацоўнікаў міліцыі, так і шматлікіх гасцей, якія ўдзельнічалі ва ўрачыстым святкаванні Дня міліцыі.