БДАМЛМ на адкрыцці выставы «Лаўрэаты Нацыянальнай літаратурнай прэміі 2024 года»

28 лютага 2025 года работнікі Беларускага дзяржаўнага архіва-музея літаратуры і мастацтва (далей – БДАМЛМ) прынялі ўдзел ва ўрачыстым адкрыцці часовай літаратурна-дакументальнай выставы «Лаўрэаты Нацыянальнай літаратурнай прэміі 2024 года» ў рамках праекта «Літаратурная брама ХХІ стагоддзя», якая распачала сваю працу ў Дзяржаўным музеі гісторыі беларускай літаратуры.

З уступным словам выступіла куратар выставы, загадчык навукова-экспазіцыйнага аддзела літаратурнага музея Ірына Расціславаўна Князева. Яна падкрэсліла значнасць Нацыянальнай літаратурнай прэміі для развіцця сучаснай беларускай літаратуры і выказала надзею, што экспазіцыя стане крыніцай натхнення для наведвальнікаў і дапаможа ім бліжэй пазнаёміцца з творчасцю лаўрэатаў.

На выставе прадстаўлены кнігі, газеты, часопісы, рукапісы, дакументы, фотаздымкі, асабістыя рэчы лаўрэатаў Нацыянальнай літаратурнай прэміі 2024 года: Фёдара Гурыновіча, Віктара Кунцэвіча, Мікалая Мікуліча, Уладзіміра Мазго, Сяргея Міховіча, Алесі Кузняцовай.

Ганаровымі гасцямі мерапрыемства сталі лаўрэаты прэміі – рэдактар газеты «Сельская гаспадарка» Сяргей Міховіч і паэт Уладзімір Мазго.

Усіх аўтараў, уганараваных прэстыжнай літаратурнай узнагародай краіны, пры ўсёй іх рознасці, яднае адно – любоў да роднай зямлі, павага да традыцый, закладзеных у нацыянальнай літаратуры слыннымі папярэднікамі.

Работнікі БДАМЛМ мелі выдатную магчымасць пазнаёміцца з лепшымі творамі, адзначанымі нацыянальнай прэміяй, даведацца пра новых аўтараў.

1. Работнікі БДАМЛМ на адкрыцці выставы «Лаўрэаты Нацыянальнай літаратурнай прэміі 2024 года»

2. Куратар выставы, загадчык навукова-экспазіцыйнага аддзела Дзяржаўнага музея гісторыі беларускай літаратуры Ірына Расціславаўна Князева

3. Лаўрэат Нацыянальнай літаратурнай прэміі 2024 года Сяргей Міховіч

4. Лаўрэат Нацыянальнай літаратурнай прэміі 2024 года Уладзімір Мазго