Удзел БДАМЛМ ў святкаванні 65-годдзя Дзяржаўнага літаратурна-мемарыяльнага музея Якуба Коласа

4 снежня 2024 года дырэктар Беларускага дзяржаўнага архіва-музея літаратуры і мастацтва А.А.Макаранка прыняла ўдзел ва ўрачыстым мерапрыемстве, прысвечаным 65-годдзю Дзяржаўнага літаратурна-мемарыяльнага музея Якуба Коласа.

Музей Якуба Коласа — гэта вядучы культурны цэнтр, дзе захоўваецца гісторыя жыцця і творчасці аднаго са стваральнікаў беларускай мовы і літаратуры. Размешчаны ў доме, дзе жыў Якуб Колас з 1952 да 1956 гг. Музей захоўвае асабістыя рэчы паэта і яго сям’і, кнігі, рукапісы, дакументы, мастацкія работы, якія ўвекавечваюць выяву народнага паэта і герояў яго твораў. Музей заснаваны 16 жніўня 1956 г. Адкрыты для наведвання 4 снежня 1959 г.

У час мерапрыемства для гасцей была праведзена экскурсія па мемарыяльнай экспазіцыі музея і часовай экспазіцыі «Заступнік бацькавай спадчыны» да 110-годдзя з дня нараджэння Данілы Міцкевіча, першага дырэктара музея. Арганізавана адкрыццё арт-аб’ектаў на тэрыторыі музея.

Урачыстае мерапрыемства сабрала вялікую колькасць гасцей і партнёраў Дзяржаўнага літаратурна-мемарыяльнага музея Якуба Коласа. З віншаваннямі ў адрас кіраўніцтва і калектыву музея выступіў Міністр культуры Рэспублікі Беларусь Р.І.Чарніцкі. У завяршэнні мерапрыемства адбыўся святочны канцэрт.

Беларускі дзяржаўны архіў-музей літаратуры і мастацтва сардэчна віншуе нашых калег і партнёраў з юбілеем! Жадаем міру, дабра і росквіту!

1. А.А.Макаранка і І.У.Матяс падчас правядзення ўрачыстага мерапрыемства

2. Работнікі літаратурна-мемарыяльнага музея Я.Коласа падчас уручэння грамат і падзяк

3. Падчас выступлення ансамбля «Песняры»