Аб сумесным удзеле Беларускага дзяржаўнага архіва кінафотафонадакументаў і Беларускага дзяржаўнага архіва навукова-тэхнічнай дакументацыі ў адкрыцці выстаўкі «Пасляваенная архітэктура Беларусі ў архіўных дакументах і матэрыялах. 1945-1955 гг.» у Беларускім дзяржаўным музеі гісторыі Вялікай Айчыннай вайны

23 верасня 2022 г. у Беларускім дзяржаўным музеі гісторыі Вялікай Айчыннай вайны адбылося адкрыццё часовай экспазіцыі «Пасляваенная архітэктура Беларусі ў архіўных дакументах і матэрыялах. 1945-1955 гг.», прымеркаванай да Года гістарычнай памяці.

Выстава заклікана азнаёміць гледача з разбуральнымі наступствамі Вялікай Айчыннай вайны для аблічча беларускіх гарадоў, аб працоўным подзвігу архітэктараў і гараджан па аднаўленні архітэктурных збудаванняў у пасляваеннае дзесяцігоддзе.

Фокус архіўных дакументаў, прадстаўленых у экспазіцыі, засяроджаны на Мінску. Сёння гэты горад, які нядаўна адзначыў сваё 935-годдзе, выглядае сучасным, развітым еўрапейскім горадам. Але такім ён стаў далёка не адразу. Беларуская сталіца, моцна разбураная ў гады Вялікай Айчыннай вайны, здолела адрадзіцца з попелу і руін да 1953 г. і сёння па праве з’яўляецца прадметам гонару мінчан.

У рамках удзелу ў выставе «Пасляваенная архітэктура Беларусі 1945-1955 гг.» БДАКФФД дае 19 адзінак захоўвання кінадакументаў.

Сюжэты гэтых дакументаў прысвечаны мірнаму будаўніцтву Беларускай ССР і аднаўленню народнай гаспадаркі пасля Вялікай Айчыннай вайны. Гэта кіналетапіс працоўнага подзвігу беларускага народа, які з руін аднавіў краіну пасля нямецка-фашысцкай акупацыі.

Усе матэрыялы ўяўляюць сабой сюжэты з кіначасопіса «Советская Белоруссия» і «Навіны дня» за 1945-1955 гг., а таксама кінанарысы «Мінск аднаўляецца» (1946 г.) і «Мінск» (1949 г.), кіначасопіс «Будаўнікі» ( №4, спецвыпуск), кіналетапіс «Шчасце народа» (1949 г.).

Беларускі дзяржаўны архіў навукова-тэхнічнай дакументацыі прадставіў на выставе асабістыя дакументы з фонду аднаго з выдатных дойлідаў ХХ стагоддзя, чые работы паўплывалі на фарміраванне архітэктурнага аблічча пасляваеннага Мінска – Іосіфа Рыгоравіча Лангбарда.

Падобныя праекты вельмі важныя ў мэтах папулярызацыі дакументаў Нацыянальнага архіўнага фонду Рэспублікі Беларусь. З іх дапамогай унікальныя дакументы становяцца даступнымі літаральна кожнаму грамадзяніну нашай краіны.

1. Выступленне дырэктара Беларускага дзяржаўнага музея гісторыі Вялікай Айчыннай вайны В.С.Варапаева на адкрыцці выставы (23 верасня 2022 г., БДАКФФД)

2. Выступленне дырэктара Беларускага дзяржаўнага архіва навукова-тэхнічнай дакументацыі А.М.Запартыка на адкрыцці выставы (23 верасня 2022 г., БДАКФФД)

3. Выступленне архівіста 1 кваліфікацыйнай катэгорыі аддзела выкарыстання дакументаў і інфармацыі Беларускага дзяржаўнага архіва кінафотафонадакументаў М.Д.Раманавай на адкрыцці выстаўкі (23 верасня 2022 г., БДАКФФД)

4. Ля экспазіцыйных стэндаў злева направа: архітэктар, лаўрэат Дзяржаўнай прэміі Г.Л.Лявіна, загадчык аддзела фарміравання Нацыянальнага архіўнага фонду Л.В.Дубатоўка, архівіст 1 кваліфікацыйнай катэгорыі аддзела выкарыстання дакументаў і інфармацыі М.Д.Раманава, вядучы арх. лабараторыі рэстаўрацыі дакументаў М.А.Шмалій (23 верасня 2022 г., БДАКФФД)

5. Вучоны сакратар Беларускага дзяржаўнага музея гісторыі Вялікай Айчыннай вайны А.М.Гаўрылава падчас адкрыцця выставы (23 верасня 2022 г., БДАКФФД)