Прадстаўнікі Дэпартамента па архівах і справаводстве Міністэрства юстыцыі Рэспублікі Беларусь і Нацыянальнага архіва прынялі ўдзел у рабоце круглага стала ў Брэсце
Дэлегацыя Дэпартамента па архівах і справаводстве Міністэрства юстыцыі Рэспублікі Беларусь у асобе дырэктара Дэпартамента В.І. Кураша і Нацыянальнага архіва Рэспублікі Беларусь (НАРБ) у асобе дырэктара А.К. Дзямянюка і загадчыка аддзела публікацый, к.г.н. С.В. Кулінка прыняла ўдзел у працы круглага стала, прымеркаванага да гадавіны пачатку Вялікай Айчыннай вайны і прэзентацыі кнігі «1941—1945. Беларусь – Расія. Партызанскі рух у гады Вялікай Айчыннай вайны».
Сярод удзельнікаў форуму — вядомыя палітычныя дзеячы Беларусі і Расіі, кіраўнікі міністэрстваў, вучоныя, прадстаўнікі грамадскіх і ветэранскіх арганізацый, пісьменнікі, супрацоўнікі музеяў і інш. З уступнымі словамі да прысутных звярнуліся: Дзяржаўны сакратар Саюзнай дзяржавы Д.Ф. Мезенцаў; дырэктар Службы знешняй разведкі Расійскай Федэрацыі і Старшыня Расійскага гістарычнага таварыства С.Я. Нарышкін; памочнік Прэзідэнта Расійскай Федэрацыі В.Р. Мядзінскі і інш.
З прэзентацыяй кнігі выступіў галоўны рэдактар выдавецкага дома «Звязда» А.М. Карлюкевіч. Ён зазначыў, што ў Год гістарычнай памяці ўжо рэалізаваны шэраг знакавых праектаў, у тым ліку шматтомнае выданне «Без тэрміна даўнасці. Беларусь».
Дырэктар Дэпартамента па архівах і справаводстве Міністэрства юстыцыі Рэспублікі Беларусь В.І. Кураш у ходзе свайго выступлення адзначыў важнасць увядзення ў навуковы абарот першакрыніц – архіўных дакументаў, якія з’яўляюцца асновай любога навуковага даследавання і надзейнай абаронай гістарычнай справядлівасці. Ён таксама прэзентаваў Дзяржаўнаму сакратару Саюзнай дзяржавы Д.Ф. Мезенцаву поўны камплект зборнікаў дакументаў з 6 кніг з серыі «Без тэрміна даўнасці. Беларусь».
