Сустрэча супрацоўнікаў установы «Дзяржаўны архіў грамадскіх аб’яднанняў Гомельскай вобласці» з навучэнцамі 9-11 класаў дзяржаўнай установы адукацыі «Сярэдняя школа №17» г. Гомеля

Апублікавана: 15 красавіка 2022 г.

15 красавіка 2022 года адбылася сустрэча супрацоўнікаў установы «Дзяржаўны архіў грамадскіх аб’яднанняў Гомельскай вобласці» з навучэнцамі 9-11 класаў дзяржаўнай установы адукацыі «Сярэдняя школа №17 г. Гомеля імя Франсіска дэ Міранды» ў суправаджэнні Янчанкі Алены Рыгораўны, намесніка дырэктара па вучэбнай рабоце.

У рамках акцыі «Архівы – школе» супрацоўнікамі архіва быў праведзены ўрок гістарычнай памяці па тэме: «11 красавіка – Міжнародны дзень вызвалення вязняў фашысцкіх канцлагераў».

Адкрыла мерапрыемства дырэктар архіва Абрамава Н.Ю., якая расказала хлопцам пра гісторыю ўзнікнення Міжнароднага дня вызвалення вязняў фашысцкіх канцлагераў і зачытала вытрымкі з выяўленых і змешчаных на захоўванні ў архіве дакументаў. Ва ўспамінах генерала П.І. Батава быў апісаны эпізод вызвалення вязняў лагера «Азарычы». Акрамя гэтага, былі агучаныя ўспаміны былых малалетніх вязняў і паказанні відавочцаў.

Навучэнцам быў прадэманстраваны дакументальны фільм Агенцтва тэленавін «10 дзён пекла: фільм АТН аб лагеры смерці «Азарычы», а таксама, для пашырэння кругагляду і павышэння цікавасці навучэнцаў да гісторыі Вялікай Айчыннай вайны арганізавана гісторыка-пазнавальная віктарына «Малавядомыя факты з гісторыі Вялікай вайны 1941-1945 гг.».

Пазней у чытальнай зале, хлопцы, падзеленыя на групы, паспрабавалі сябе ў ролі даследчыкаў. Кожная група атрымала дакумент, з якога неабходна было атрымаць максімальную колькасць інфармацыі. Такім чынам, школьнікам была дадзена магчымасць азнаёміцца з гістарычнымі падзеямі праз архіўныя дакументы. Неабходна адзначыць, што такая форма зносін выклікала ў іх вялікую цікавасць.

У заключэнне, А.І.Сідорка, загадчыца аддзела ўліку і захаванасці дакументаў, правяла для навучэнцаў аглядную экскурсію па архівасховішчах, падчас якой юнакі і дзяўчаты пазнаёміліся з асноўнымі напрамкамі работы архіва, складам дакументаў і асаблівасцямі іх захоўвання.