Адкрыццё банернай выстаўкі ў Гродзенскім дзяржаўным універсітэце імя Янкі Купалы, прысвечанай трагедыі беларускіх вёсак, спаленых у гады Вялікай Айчыннай вайны
16 лютага 2022 г. у Гродзенскім дзяржаўным універсітэце імя Янкі Купалы адбылося адкрыццё банэрнай выставы Нацыянальнага архіва Рэспублікі Беларусь, прысвечанай трагедыі беларускіх вёсак, спаленых у гады Вялікай Айчыннай вайны.
Дэкан факультэта гісторыі, камунікацыі і турызму кандыдат гістарычных навук, дацэнт В.А.Белазаровіч звярнуў увагу студэнцкай моладзі на неабходнасць захавання аб’ектыўнай гістарычнай Памяці аб падзеях вайны. Ён падкрэсліў, што супраць мірнага насельніцтва нашай рэспублікі праводзілася загадзя спланаваная і арганізаваная палітыка знішчэння, адным з трагічных сімвалаў якой сталі спаленыя і знішчаныя вёскі.
Дырэктар універсітэцкай бібліятэкі Н.У.Грынько ў звароце да студэнтаў адзначыў, што для іх, як для будучых выкладчыкаў, важна не толькі ведаць і памятаць трагічную гісторыю нашай краіны, але і перадаваць яе маладому пакаленню беларусаў.
Дырэктар Нацыянальнага архіва Рэспублікі Беларусь (НАРБ) А.К.Дземянюк у прывітальным слове расказаў аб рабоце, якую праводзіць архіў па захаванні Памяці аб тых страшных падзеях і па ўвядзенні ў навуковы абарот дакументальных крыніц. У прыватнасці, ён адзначыў, што ўжо апублікаваны шэраг зборнікаў па гэтай тэме: «Хатынь. Трагедыя і памяць», «Трагедыя беларускіх вёсак, 1941–1944», «Хатынскі некропаль», «Спаленыя вёскі Беларусі», «Спаленыя вёскі Расіі» і інш. Пры непасрэдным удзеле архіва створана і актыўна дзейнічае адзіная ў сваім родзе на постсавецкай прасторы агульнадаступная база даных «Беларускія вёскі, спаленыя ў гады Вялікай Айчыннай вайны».
Дырэктар фонду «Гістарычная памяць» (г. Масква) Аляксандр Дзюкаў распавёў аб тым, як ён удзельнічаў у апытанні жыхароў Верхнядзвінскага раёна аб падзеях акупацыі. Гэтыя каштоўныя ўспаміны ўжо часткова апублікаваны. Ён таксама звярнуў увагу на тое, што аналагічная база даных па спаленых вёсках настойліва неабходна і для расійскай грамадскасці.
Пасля ўрачыстай часткі адзін са студэнтаў універсітэта правёў экскурсію па матэрыялах выставы.
Інфармацыю падрыхтаваў загадчык аддзела публікацый С.В. Кулінок
