19 мая 2021 г. на 63-м годзе пайшоў з жыцця гісторык-архівіст Сяргей Уладзіміравіч Жумар

19 мая 2021 г. на 63-м годзе пайшоў з жыцця гісторык-архівіст Сяргей Уладзіміравіч Жумар.

С.У.Жумар нарадзіўся 10 лістапада 1958 г. у г. Мінску ў сям’і служачых. У 1976 г. скончыў СШ № 70 г. Мінска. З 1977 па 1983 гг. працаваў лабарантам у сектары археалогіі Інстытут гісторыі Акадэміі навук БССР, у Беларускім політэхнічным інстытуце. Адначасова вучыўся на вячэрнім аддзяленні гістарычнага факультэта Беларускага дзяржаўнага ўніверсітэта імя У.І.Леніна, які з адзнакай скончыў у 1983 г. Выкладаў гісторыю і грамадазнаўства ў СШ № 46 г. Мінска.

У архіўнай галіне Беларусі С.У.Жумар працаваў з 1984 г. Быў захавальнікам фондаў аддзела спецфондаў Цэнтральнага дзяржаўнага архіва кастрычніцкай рэвалюцыі БССР, архівістам 1-й катэгорыі, вядучым архівістам аддзела камплектавання і ведамасных архіваў (за кошт спецсродкаў) Цэнтральнага дзяржаўнага архіва кастрычніцкай рэвалюцыі БССР. Са жніўня 1992 г. працаваў навуковым супрацоўнікам аддзела архівазнаўства Беларускага навукова-даследчага інстытута дакументазнаўства і архіўнай справы. З 1995 г. – загадчыкам аддзела архівазнаўства. У 1996 г. абараніў кандыдацкую дысертацыю “Акупацыйны друк на тэрыторыі Беларусі ў гады Вялікай Айчыннай вайны (па матэрыялах беларускамоўных выданняў)”. У 2000 г. быў пераведзены на пасаду намесніка дырэктра Беларускага навукова-даследчага інстытута дакументазнаўства і архіўнай справы. З’яўляўся членам ЦЭМК, Археаграфічнай камісіі Белкамархіва, Вучонага савета Беларускага навукова-даследчага інстытута справаводства і архіўнай справы, навуковых саветаў шэрагу дзяржаўных архіваў, у 2003 – 2013 гг. – быў членам экспертнага савета ВАК Рэспублікі Беларусь.
Займаўся даследаваннем праблем гісторыі Вялікай Айчыннай выйны, гістарычных і метадычных аспектаў архіўнай справы.

Аўтар шэрагу метадычных рэкамендацый па архіўнай справе і справаводству і даведнікаў по гісторыі Беларусі. Адказны складальнік пералікаў тыпавых дакументаў арганізацый з указаннем тэрмінаў захоўвання, міжгаліновых пералікаў навукова-тэхнічнай дакументацыі, шэрагу ведамасных пералікаў.

За навуковыя дасягненні Сяргей Уладзіміравіч Жумар быў узнагарожданы нагрудным знакам «Ганаровы архівіст Беларусі», ганаровымі граматамі Федэральнага архіўнага агенцтва Расіі, Дзяржаўнага камітэта архіваў Украіны, Украінскага навукова-даследчага інстытута архіўнай справы і дакументазнаўства, Дэпартамента па архівах і справаводству, Міністэрства юстыцыі Рэспублікі Беларусь і інш.

Добрая памяць пра Сяргея Уладзіміравіча Жумара назаўжды застанецца ў сэрцах усіх, хто яго ведаў.