1 ліпеня адбылося адкрыццё пасля рамонту і рэканструкцыі новага архівасховішча Дзяржаўнага архіва Віцебскай вобласці

Ва ўрачыстай цырымоніі прынялі ўдзел Міністр юстыцыі Рэспублікі Беларусь Я.І.Каваленка, старшыня Віцебскага аблвыканкама А.М.Субоцін, дырэктар Дэпартамента па архівах і справаводству Міністэрства юстыцыі Рэспублікі Беларусь А.Л.Воінаў, старшыня Віцебскага гарвыканкама Г.Г.Сабыніч.

Як адзначыў Яўген Іосіфавіч Каваленка, архівы заўсёды былі абавязковым атрыбутам, сімвалам дзяржаўнасці, без якіх няма гісторыі краіны і народа, няма нацыі. Найвышэйшая адказнасць архівістаў перад будучымі пакаленнямі заключаецца ў зборы і захаванні паўнацэнных архіўных фондаў у інтарэсах народа і дзяржавы.

Рэканструкцыю будынку праводзілі ў 2022-2024 гадах за кошт сродкаў абласнога бюджэту. На гэтыя мэты выдаткавана больш за 5,7 мільёна беларускіх рублёў. Праектная магутнасць новага архівасховішча складае каля 400 тысяч спраў.

У будынку ўстаноўлены грузавы ліфт грузападымальнасцю да 300 кілаграмаў, што значна аблегчыць працу архівістаў. Сховішчы абсталяваны сучаснымі сістэмамі кандыцыянавання і падтрымання тэмпературна-вільготнага рэжыму, усе працоўныя месцы спецыялістаў аўтаматызаваны.

Адкрыццё адбылося напярэдадні Дня незалежнасці – галоўнага свята беларускай дзяржаўнасці. У гэты дзень, 3 ліпеня 1944 года, ад нямецка-фашысцкіх захопнікаў была вызвалена сталіца рэспублікі – г.Мінск.

У рамках мерапрыемства намеснік дырэктара Нацыянальнага архіва Рэспублікі Беларусь, кандыдат гістарычных навук Святаслаў Кулінок прэзентаваў унікальнае выданне – зборнік дакументаў і матэрыялаў «Нацысцкія карныя аперацыі супраць партызан Полацка-Лепельскай зоны. Красавік – травень 1944 г.».

У фае архівасховішча ўдзельнікам і гасцям мерапрыемства на дэманстрацыйным экране былі паказаны два хранікальна-дакументальныя фільмы, падрыхтаваныя БДАКФФД у рамках праекта «Адкрыты кінаархіў. Гэты дзень мы набліжалі, як маглі» – «Вызваленне Віцебска» і «Вызваленне Беларусі».

1. Будынак архівасховішча па праспекце Фрунзэ, 90а

2. Намеснік дырэктара ТАА «Праф НК» Аляксандр Драбо перадаў сімвалічны ключ ад будаўнікоў дырэктару Дзяржаўнага архіва Віцебскай вобласці Таццяне Свістуновай

3. Урачыстая цырымонія адкрыцця

4. Экскурсія ў адным з архівасховішчаў

5. Падчас прэзентацыі зборніка дакументаў і матэрыялаў «Нацысцкія карныя аперацыі супраць партызан Полацка-Лепельскай зоны. Красавік – травень 1944 г».