12 верасня 2022 года ў рамках мерапрыемстваў, прысвечаных 100-годдзю архіўнай службы Беларусі, ва ўстанове “Беларускі дзяржаўны архіў навукова-тэхнічнай дакументацыі” прайшоў Адзіны дзень адчыненых дзвярэй
12 верасня 2022 года ў рамках мерапрыемстваў, прысвечаных 100-годдзю архіўнай службы Беларусі, ва ўстанове «Беларускі дзяржаўны архіў навукова-тэхнічнай дакументацыі» прайшоў Адзіны дзень адчыненых дзвярэй.
Будынак Беларускага дзяржаўнага архіва навукова-тэхнічнай дакументацыі размешчаны ў гістарычным цэнтры г. Мінска і яго гісторыя заўсёды выклікае павышаную цікавасць у мінчан і гасцей сталіцы. У Адзіны дзень адчыненых дзвярэй для ўсіх жадаючых былі арганізаваны бясплатныя экскурсіі па архіве.
З мэтай прыцягнення маладзёжнай аўдыторыі былі праведзены экскурсіі па архіве для вучняў 9-ых класаў Дзяржаўнай установы адукацыі “Гімназія № 18 г. Мінска” і Дзяржаўнай установы адукацыі “Сярэдняя школа № 8 г. Жодзіна”.
У ходзе экскурсіі навучэнцы даведаліся, што дакументы, якія захоўваюцца ў архіве, аб’яднаны ў групы па характары дзейнасці фондаўтваральнікаў і іх зместу. На гэтай падставе вылучаюць праектную, канструктарска-тэхналагічную, навукова-даследчую, патэнтную і кіраўнічую дакументацыю.
У аддзеле інфармацыі і выкарыстання дакументаў экскурсантам былі прадэманстраваны дакументы буйнейшага фондаўтваральніка архіва, аднаго са старэйшых праектных інстытутаў Беларусі – Белдзяржпраекта, цяпер Белпраекта, а таксама Мінскпраекта і Белпрампраекта.
Экскурсія па архіве з дэманстрацыяй дакументаў дазволіла сфарміраваць у вучняў поўнае ўяўленне аб прамысловым, энергетычным, сельскагаспадарчым, водагаспадарчым, транспартным, жыллёва-грамадзянскім будаўніцтве ў рэспубліцы.
У гэты ж дзень архіў наведалі студэнты 1 курса гістарычнага факультэта гісторыка-архіўнага аддзялення Беларускага дзяржаўнага ўніверсітэта.
Студэнты пазнаёміліся з гісторыяй Беларускага дзяржаўнага архіва навукова-тэхнічнай дакументацыі, яго будынкам, структурай, напрамкамі дзейнасці, пазнаёміліся з унікальнай дакументацыяй, якую можна выкарыстоўваць для напісання навуковых прац.
У выніку экскурсіі студэнты даведаліся аб дзейнасці Беларускага дзяржаўнага архіва навукова-тэхнічнай дакументацыі.
