22 лютага ў Мастацкай галерэі Міхаіла Савіцкага адбылося адкрыццё выставы «Мінск Іосіфа Лангбарда»
22 лютага 2017 года ў Мастацкай галерэі Міхаіла Савіцкага адбылося адкрыццё сумеснай выставы «Мінск Іосіфа Лангбарда», прысвечанай 135-годдзю з дня нараджэння Заслужанага дзеяча мастацтваў і архітэктуры БССР (1934), доктара архітэктуры (1939), прафесара (1939) Іосіфа Рыгоравіча Лангбарда (1882-1951). На выставе прадстаўлены дакументы і экспанаты з фондаў Беларускага дзяржаўнага архіва навукова-тэхнічнай дакументацыі і Прэзідэнцкай бібліятэкі Рэспублікі Беларусь.
Экспазіцыя выставы адлюстроўвае яркі і насычаны жыццёвы шлях І.Р. Лангбарда, яго творчае, грамадскае і паўсядзённае жыццё.
На адкрыцці выставы выступілі дырэктар Беларускага дзяржаўнага архіва навукова-тэхнічнай дакументацыі А. М. Запартыка, дэкан архітэктурнага факультэта БНТУ, доктар архітэктуры, прафесар А. С. Сардараў, Заслужаны архітэктар Ю. М. Градаў, супрацоўнік БДАНТД Г. І. Шастак, член праўлення Беларускага саюза архітэктараў М. Л. Гаухфельд і інш.
Іосіф Рыгоравіч Лангбард нарадзіўся 18 студзеня 1882 г. у г. Бельску Гродзенскай губерні (зараз Рэспубліка Польшча). У 1914 г. ён скончыў Пецярбургскую акадэмію мастацтваў. У гады Першай сусветнай вайны служыў у будаўнічым атрадзе, займаўся будаўніцтвам умацаванняў. З вясны 1918 г. да 1932 г. Іосіф Лангбард працаваў вытворцам работ у будаўнічай канторы Ленінградскага аблздраўаддзела. У 1929 г. праект Лангбарда выйграў Усесаюзны конкурс на будаўніцтва Дома ўрада БССР, узвядзенне якога было завершана ў 1934 г. У 1930-я гады архітэктар стварыў свае найбольш значныя праекты ў Беларусі: Дом Чырвонай Арміі (1934-1939), Дзяржаўны тэатр оперы і балета БССР (1933-1937), галоўны корпус Акадэміі навук БССР (1939). Архітэктурная спадчына Іосіфа Лангбарда знаходзіцца ў Кіеве, Харкаве, Кастраме, Санкт-Пецярбургу, Самары.
Пасля вызвалення сталіцы Беларусі Іосіф Лангбард прыехаў у Мінск, дзе прымаў актыўны ўдзел у працы па аднаўленні горада. З яго ўдзелам быў распрацаваны «Эскіз планіроўкі Мінска». У 1949 г. Іосіф Лангбард быў узнагароджаны ордэнам «Знак Пашаны».