Рубрыка:

Дэлегацыя Агенцтва «Узархіў» наведала Нацыянальны гістарычны архіў Беларусі і Беларускі навукова-даследчы інстытут дакументазнаўства і архіўнай справы

Апублікавана: 9 верасня 2026 г.

8 верасня 2026 года Нацыянальны гістарычны архіў Беларусі і Беларускі навукова-даследчы інстытут дакументазнаўства і архіўнай справы наведала дэлегацыя Агенцтва «Узархіў» пры Міністэрстве юстыцыі Рэспублікі Узбекістан. У склад дэлегацыі ўвайшлі дырэктар Агенцтва Улугбек Мірталібавіч Юсупаў, які ўзначаліў візіт, галоўны спецыяліст па міжнародных сувязях названага Агенцтва Дылрабо Сайдулаеўна Дадаева і начальнік тэрытарыяльнага ўпраўлення па архіўнай справе горада Ташкента Ірада Тахіраўна Тахтаева. Замежных калегаў суправаджаў дырэктар Дэпартамента па архівах і справаводству Міністэрства юстыцыі Рэспублікі Беларусь Алег Леанідавіч Воінаў.

Падчас візіту госці наведалі архівасховішчы, аддзел аблічбоўкі архіўных дакументаў і чытальныя залы. Прадстаўнікі Узбекістана падрабязна азнаёміліся з гісторыяй і асноўнымі напрамкамі дзейнасці НГА Беларусі і БелНДІДАС, сістэмай кандыцыянавання, а таксама з умовамі, створанымі для забеспячэння захаванасці дакументаў. Госці прайшліся па тэрыторыі архіва. Намеснік дырэктара архіва Сяргей Мікалаевіч Рындзін прадэманстраваў дэлегацыі архіўныя дакументы, якім прысвоены статус унікальных, і кніжныя выданні НГА Беларусі. Напрыканцы сустрэчы гасцям былі ўручаны памятныя падарункі – зборнікі фатаграфічных дакументаў па гісторыі навучальных устаноў горада Мінска і выданні БелНДІДАС.