Маштабы саюзнай інтэграцыі: дзяржархіў Мінскай вобласці прэзентаваў гісторыка-дакументальны выставачны праект на XIII Форуме рэгіёнаў у Маладзечне

Супрацоўнікі Установы «Дзяржаўны архіў Мінскай вобласці» прынялі ўдзел у інфармацыйным суправаджэнні мерапрыемства XIII Форуму рэгіёнаў Беларусі і Расіі.

XIII Форум рэгіёнаў Беларусі і Расіі праходзіць 25-26 чэрвеня ў г.Мінску і Мінскай вобласці. У мерапрыемстве бяруць удзел больш за тысячу чалавек, якія падчас тэматычных секцый у першы дзень форуму разгледзелі актуальныя пытанні ўзаемадзеяння дзвюх краін — ад прамысловасці да навукі і медыцыны, закранаючы аграпрамысловую кааперацыю беларускіх і расійскіх прадпрыемстваў. За гады правядзення форум набыў статус традыцыйнай дыялогавай пляцоўкі для прадстаўнікоў органаў улады і бізнес-супольнасцей Расіі і Беларусі. Арганізатарамі форуму выступаюць Савет Рэспублікі Беларусі і Савет Федэрацыі Расіі.

У той час як асноўныя лакацыі і галоўная выстава-кірмаш форуму разгарнуліся на цэнтральнай пляцоўцы ў г.Мінску, г.Маладзечна стаў ключавым месцам правядзення маштабных выязных сесій, якія сабралі прадстаўнічыя дэлегацыі, кіраўніцтва профільных міністэрстваў, ведамстваў і экспертнай супольнасці дзвюх краін.

25 чэрвеня ў г.Маладзечне адбылося першае пасяджэнне Камітэта па стандартызацыі і якасці Саюзнай дзяржавы. Асноўныя задачы Камітэта — забеспячэнне тэхналагічнага суверэнітэту, абарона рынку ад небяспечных тавараў, апярэджанне перашкод для ўзаемнага гандлю і кааперацыі. У парадку дня каля дзясятка пытанняў.

Важным элементам дзелавой і культурнай праграмы на маладзечанскай пляцоўцы стала прэзентацыя архіўных дакументаў цэнтральнага рэгіёна, падрыхтаваная дзяржархівам Мінскай вобласці. У будынку аддзела ЗАГС Маладзечанскага раённага выканаўчага камітэта была разгорнута перасовачная банэрная гісторыка-дакументальная выстаўка «Мінская вобласць — сэрца Вялікай Беларусі». Праект заснаваны на архіўных першакрыніцах і ў дакументах адлюстроўвае ключавыя вехі развіцця Міншчыны: ад яе ўтварэння ў 1938 годзе да аднаўлення ў пасляваенны перыяд і будаўніцтва найбуйнейшых прамысловых аб’ектаў. Экспазіцыя наглядна дэманструе дынаміку рэгіёна як у сферы агульнага будаўніцтва, так і ў розных галінах народнай гаспадаркі.

Асаблівую ўвагу гасцей прыцягнула непасрэднае інфармацыйнае суправаджэнне выстаўкі спецыялістамі Дзяржаўнага архіва Мінскай вобласці. Архівісты выступалі ў ролі гідаў, праводзячы экскурсіі ля выставачных стэндаў для ўдзельнікаў і гасцей форуму. Наведвальнікі змаглі не толькі азнаёміцца з гістарычнай храналогіяй, але і атрымаць кваліфікаваныя каментарыі да прадстаўленых дакументаў, карт і статыстычных звестак.

Прэзентацыя выставачнага праекта на міжнародным узроўні пацвердзіла значнасць архіўных дакументаў у інфармацыйным суправаджэнні маштабных грамадска-палітычных форумаў. Работа спецыялістаў Дзяржаўнага архіва Мінскай вобласці дазволіла наглядна раскрыць гістарычны патэнцыял цэнтральнага рэгіёну і ўнесла важкі ўклад ва ўмацаванне міжрэгіянальнага культурнага супрацоўніцтва.

На фота: Падчас мерапрыемства