Аб правядзенні навучальных заняткаў у аддзеле навукова-тэхнічнай апрацоўкі дакументаў

Апублікавана: 28 красавіка 2026 г.

У рамках запланаванага цыкла навучальных заняткаў для работнікаў аддзела навукова-тэхнічнай апрацоўкі дакументаў 7 – 8 красавіка 2026 г. і 28 красавіка 2026 г. праведзены заняткі па тэмах «Складанне актаў аб выдзяленні да знішчэння дакументаў і спраў, якія не падлягаюць захоўванню» і «Афармленне актаў аб выдзяленні да знішчэння дакументаў і спраў, якія не падлягаюць захоўванню».

Навучальны занятак №5 «Складанне актаў аб выдзяленні да знішчэння дакументаў і спраў, якія не падлягаюць захоўванню» праведзены намеснікам загадчыка аддзела навукова-тэхнічнай апрацоўкі дакументаў Ісайчук Н.В. і загадчыкам сектара экспертызы каштоўнасці дакументаў і апісання спраў дзяржаўных арганізацый аддзела навукова-тэхнічнай апрацоўкі дакументаў Ермашкевіч А.М.

На занятках былі разгледжаны пытанні правядзення экспертызы каштоўнасці дакументаў, іх апісання, фарміравання звязкаў спраў і этапы ўключэння ў акты аб выдзяленні да знішчэння дакументаў і спраў, якія не падлягаюць захоўванню.

Ермашкевіч А.М. і Ісайчук Н.В. азнаёмілі работнікаў з нарматыўна-прававымі і метадычнымі дакументамі і парадкам іх прымянення. На занятках былі разгледжаны пытанні па размежаванні актаў аб выдзяленні да знішчэння дакументаў і спраў, якія не падлягаюць захоўванню, з адзнакай «ЭПК» і без адзнакі «ЭПК», уключэнню ў акты спраў, якія змяшчаюць дакументы з рознымі тэрмінамі захоўвання, прастаўленню індэксаў спраў, прыведзены прыклады складання пазіцый актаў з рознымі відамі дакументаў.

Ермашкевіч А.М. падрыхтавала алгарытм апісання спраў, якія ўключаюцца ў акты аб выдзяленні да знішчэння дакументаў і спраў, якія не падлягаюць захоўванню, падрабязна спынілася на асвятленні пытанняў выкарыстання пералікаў дакументаў (тыпавога, ведамасных і інш.), вызначэння тэрмінаў захоўвання дакументаў у адпаведнасці з пералікамі, а таксама ўстанаўлення тэрмінаў захоўвання для відаў дакументаў, не адлюстраваных у пераліках.

Ісайчук Н.В. у сваім выступленні спынілася на пытаннях уключэння бухгалтарскіх дакументаў у акты аб выдзяленні да знішчэння дакументаў і спраў, якія не падлягаюць захоўванню. Надзея Васільеўна расказала аб бухгалтарскім уліку ў арганізацыях, складзе і відах дакументаў бухгалтарскага ўліку і прывяла класіфікацыю бухгалтарскіх дакументаў. Былі разгледжаны пытанні правядзення праверак захавання падатковага заканадаўства, усе дадатковыя ўмовы вызначэння тэрмінаў захоўвання бухгалтарскіх дакументаў і прыведзены алгарытм вылічэння тэрмінаў іх захоўвання.

Работнікам аддзела было прапанавана прымяніць на практыцы тэарэтычныя веды, атрыманыя падчас заняткаў. Ермашкевіч А.М. падрыхтавала справы і дакументы для ўключэння ў акты аб выдзяленні да знішчэння, наменклатуры спраў, пералікі з указаннем тэрмінаў захоўвання. Работнікі самастойна правялі экспертызу каштоўнасці дакументаў, устанавілі іх тэрміны захоўвання і на картках склалі пазіцыі для актаў з указаннем загалоўкаў, індэксаў, храналагічнага перыяду, колькасці спраў. Анжаліка Мікалаеўна дапамагла на практыцы разабраць спрэчныя моманты і адказала на ўсе пытанні работнікаў.

Навучальны занятак №6 «Афармленне актаў аб выдзяленні да знішчэння дакументаў і спраў, якія не падлягаюць захоўванню» праведзены загадчыкам сектара экспертызы каштоўнасці дакументаў і апісання спраў дзяржаўных арганізацый аддзела навукова-тэхнічнай апрацоўкі дакументаў Ермашкевіч А.М. На занятку былі разгледжаны пытанні размяшчэння структурных падраздзяленняў і сістэматызацыі пазіцый з загалоўкамі ў актах, а таксама тэхнічнае афармленне актаў аб выдзяленні да знішчэння дакументаў і спраў, якія не падлягаюць захоўванню: камп’ютарны набор, змест граф, выніковага запісу.

Анжаліка Мікалаеўна падрабязна спынілася на пытаннях афармлення актаў у альбомнай арыентацыі, складу рэквізітаў у адпаведнасці з Інструкцыяй па справаводстве ў дзяржаўных органах, іншых арганізацыях, зацверджанай пастановай Міністэрства юстыцыі Рэспублікі Беларусь ад 29 жніўня 2025 г. №65.

Навучальныя заняткі накіраваны на павышэнне прафесіяналізму, матывацыі і эфектыўнасці работнікаў, а таксама на згуртаванне калектыву, абмен вопытам і зніжэнне цякучасці кадраў.

Работнікі аддзела навукова-тэхнічнай апрацоўкі дакументаў выказваюць падзяку Ермашкевіч А.М. і Ісайчук Н.В. за высокі ўзровень арганізацыі заняткаў, падачы інфармацыі і магчымасць адпрацоўкі тэарэтычных ведаў на практыцы.