«Сучасная беларуская жанчына: грамадзянская пазіцыя, традыцыі, будучыня». Дырэктар ЗГА ў г.Маладзечна І.З.Пудакевіч прыняла ўдзел у партыйнай дыялогавай пляцоўцы

Дырэктар Зональнага дзяржаўнага архіва ў г.Маладзечна Іна Пудакевіч выступіла з дакладам на дыялогавай пляцоўцы «Сучасная беларуская жанчына: грамадзянская пазіцыя, традыцыі, будучыня». Арганізатарам мерапрыемства, якое сабрала маладых спецыялістаў раёна для размовы пра ролю жанчыны ў лёсе краіны, выступіла раённае аддзяленне партыі.

У сваім дакладзе «Жанчына — захавальніца традыцый і рухавік новых магчымасцей», звяртаючыся да гісторыі, Інна Пудакевіч нагадала пра знакавыя жаночыя вобразы, якія сталі сімвалам мудрасці, сілы і стварэння: асветніца Ефрасіння Полацкая, гераіня Вера Харужая, а таксама наша сучасніца — першая жанчына-касманаўт суверэннай Беларусі Марына Васілеўская. «Кожная з іх у свой час пашырала гарызонты магчымага, але пры гэтым заставалася ўвасабленнем лепшых якасцей, якія заўсёды былі ўласцівы жанчыне нашай зямлі: мудрасці, працавітасці і клопату пра бліжніх», — адзначыла выступоўца. Ад гістарычных прыкладаў Іна Пудакевіч перайшла да вобраза жанчыны будучыні. Апіраючыся на актуальныя даследаванні і грамадскія ініцыятывы, напрыклад, такія як «Народная пяцігодка», яна акрэсліла пяць важных напрамкаў, па якіх магчыма развіццё ролі жанчыны ў жыцці Беларусі да 2030 года.

Асаблівая ўвага была нададзена гарманічнаму спалучэнню сямейных каштоўнасцей і прафесійнай рэалізацыі. Дакладчык падкрэсліла, што сучасныя тэхналогіі і гнуткія формы занятасці адкрываюць новыя магчымасці, дазваляючы жанчыне паспяхова раскрывацца ў прафесіі, застаючыся пры гэтым душой і захавальніцай сямейнага агменю.

Гаворачы пра эканоміку будучыні, Іна Пудакевіч адзначыла важнасць далучэння дзяўчат да навукова-тэхнічных сфер, каб такія прафесіі, як інжынер або ІТ-спецыяліст, сталі для жанчын такімі ж натуральнымі і звыклымі, як педагогіка або медыцына. Пры гэтым нязменным прыярытэтам застаецца падтрымка мацярынства і дзяцінства, асабліва ў сувязі з назіраемай тэндэнцыяй да больш позняга ўзросту нараджэння першага дзіцяці. У сваім выступленні дырэктар архіва таксама закранула тэму грамадскага прызнання жанчыны: «Беларусь заўсёды была і застаецца перагаворнай пляцоўкай, мастом паміж культурамі. І тут жаночая дыпламатыя, уменне слухаць і чуць, знаходзіць кампрамісы — гэта наша «мяккая сіла», якая здольная дапамагчы ўмацоўваць мір і ўзаемаразуменне».

Завяршаючы дыялог з маладымі спецыялістамі, Іна Пудакевіч падкрэсліла, што Год беларускай жанчыны — гэта не проста каляндарная дата, а магчымасць зазірнуць у будучыню і разам будаваць краіну, дзе кожная жанчына зможа рэалізаваць сваё прызначэнне. «Будучыня Беларусі ствараецца сёння, і ў гэтым стварэнні жанчыне адведзена асаблівая, натхняльная роля. Няхай наш агульны шлях будзе шляхам гармоніі, міру і ўпэўненасці ў заўтрашнім дні», — рэзюмавала Іна Пудакевіч.

З дакладамі таксама выступілі старшыня Маладзечанскага раённага аддзялення Мінскай вобласці БП «Белая Русь» Каліна Капуцкая і педагог Чысцінскай СШ Маладзечанскага раёна Алена Валавік. Маладыя спецыялісты актыўна ўключыліся ў абмеркаванне, пацвердзіўшы, што тэма пераемнасці пакаленняў і ролі жанчыны ў развіцці грамадства і дзяржавы застаецца актуальнай і важнай для моладзі Маладзечаншчыны.

На фота: Падчас сустрэчы.