Правядзенне ўстановай «Дзяржаўны архіў Магілёўскай вобласці» і дзяржаўнай казённай установай «Дзяржаўны архіў Астраханскай вобласці» сумеснай відэаканферэнцыі

13 лютага 2026 года ўстанова «Дзяржаўны архіў Магілёўскай вобласці» і дзяржаўная казённая ўстанова «Дзяржаўны архіў Астраханскай вобласці» (Расійская Федэрацыя) правялі чарговую сустрэчу ў фармаце відэаканферэнцыі, запланаваную ў рамках рэалізацыі Мемарандума аб устанаўленні пабрацімскіх адносін паміж муніцыпальным утварэннем «Гарадская акруга горада Астрахань» і горадам Магілёвам, а таксама ў адпаведнасці з падпісаным 20 студзеня 2026 года Пагадненнем аб супрацоўніцтве паміж архівамі двух гарадоў.

Тэмамі сустрэчы сталі пытанні забеспячэння захаванасці архіўных дакументаў, камплектавання архіўных фондаў. Намеснік дырэктара-галоўны захавальнік фондаў установы «Дзяржаўны архіў Магілёўскай вобласці» Людміла Цалабанава ва ўступным слове ахарактарызавала метадычныя матэрыялы, якія датычацца тэматыкі відэаканферэнцыі. Загадчык сектара аблічбоўкі архіўных дакументаў Аляксей Шакараў расказаў аб спецыфіцы стварэння лічбавых копій і перспектывах далейшага развіцця гэтага напрамку. Загадчык аддзела забеспячэння захаванасці дакументаў Вікторыя Смажанкова і вядучы архівіст аддзела забеспячэння захаванасці дакументаў Вольга Клебча падзяліліся з калегамі вопытам стварэння спрыяльных умоў для захоўвання дакументаў і арганізацыі ўліку архіўных фондаў. Загадчык аддзела фарміравання НАФ і справаводства Наталля Краўцова ў сваім выступленні асвятліла пытанні камплектавання архіўных фондаў, фондаў асабістага паходжання, аб арганізацыі і перадачы электронных дакументаў у ІС АЭД.

Расійскія архівісты расказалі пра асаблівасці сваёй працы і планы яе ўдасканалення.

Падчас гутаркі калегі абмяняліся досведам па ўкараненні сучасных тэхналогій забеспячэння захаванасці і ўліку архіўных фондаў, выяўленні і прыёме дакументаў на дзяржаўнае захоўванне і дакументаў асабістага паходжання, супрацоўніцтве ў сферы фармавання электронных вопісаў і працы з крыніцамі камплектавання; правядзенню сумесных кансультацый, семінараў і вебінараў, падрыхтоўцы прапаноў па абмене копіямі дакументаў, якія адлюстроўваюць агульную гісторыю развіцця рэгіёнаў.

1. Тытульны ліст відэаканферэнцыі.

2. Спікеры ўстановы «Дзяржаўны архіў Магілёўскай вобласці» падчас відэаканферэнцыі.

3. Супрацоўнікі дзяржаўнай казённай установы «Дзяржаўны архіў Астраханскай вобласці», якія прымалі ўдзел у мерапрыемстве.

4-5. Фрагменты прэзентацый, якія дэманстраваліся падчас відэаканферэнцыі.