Аб правядзенні ў Нацыянальным архіве Рэспублікі Беларусь навучальнага занятку «Падшыўка спраў»

Апублікавана: 12 лютага 2026 г.

У мэтах фарміравання нацыянальнага ладу жанчыны-працаўніцы, папулярызацыі ролі жанчын у захаванні і развіцці грамадства 2026 год Указам Прэзідэнта Рэспублікі Беларусь ад 1 студзеня 2026 г. №1 аб’яўлены Годам беларускай жанчыны.

Аддзелам навукова-тэхнічнай апрацоўкі дакументаў запланавана правядзенне ў 2026 годзе цыкла навучальных заняткаў для работнікаў аддзела. Арганізацыя і правядзенне заняткаў дазваляюць падкрэсліць ролю жанчын як кіраўнікоў і спецыялістаў, прадэманстраваць іх прафесійнае майстэрства.

Навучальныя заняткі накіраваны на павышэнне прафесіяналізму, матывацыі і эфектыўнасці работнікаў, а таксама на згуртаванне калектыву, абмен вопытам і зніжэнне цякучасці кадраў.

11 лютага 2026 г. праведзены навучальны занятак №1 «Падшыўка спраў». З прывітальным словам да ўдзельнікаў мерапрыемства звярнулася намеснік дырэктара архіва Стуканава А.А., якая адзначыла актуальнасць правядзення практычных семінараў, майстар-класаў па напрамках дзейнасці. Загадчык аддзела Скамарошчанка В.В. асвятліла тэарэтычныя пытанні, якія тычацца падшыўкі спраў, расказала аб арганізацыі працэсу работы па гэтаму напрамку ў адпаведнасці з Рабочай інструкцыяй па правядзенні пераплётных работ у ДУ «Нацыянальны архіў Рэспублікі Беларусь».

Вядучы архівіст Курдэка Т.І. распавяла пра матэрыялы, якія неабходны для падшыўкі, і патрабаванні да іх. Таццяна Іванаўна прадэманстравала ўдзельнікам, як падшываюцца справы, і падзялілася прафесійнымі «фішкамі».

Затым у кожнага работніка была магчымасць замацаваць атрыманыя веды на практыцы і самастойна падшыць справу, а таксама задаць пытанні.

Работнікі аддзела навукова-тэхнічнай апрацоўкі дакументаў адзначылі важнасць і неабходнасць валодання тэхнікай падшыўкі спраў, падзякавалі Курдэка Т.І. за высокі ўзровень арганізацыі майстар-класа і падачы інфармацыі.