Сям’я як крыніца сілы: архіўная выстава ў Маладзечне

У рамках Тыдня бацькоўскай любові ў Зональным дзяржаўным архіве ў г.Маладзечна адкрылася пранікнёная стэндавая экспазіцыя, прысвечаная сем’ям знакамітных фондаўтвалальнікаў. Праз дзіцячыя фотаздымкі, лісты да родных, здымкі з жонкамі і бацькамі раскрываюцца не толькі біяграфіі вядомых асоб, але і іх душэўная глыбіня, шчырыя пачуцці, трапяткая клопатлівасць аб блізкіх. Кожны стэнд — гэта гісторыя любові, пераемнасці і ўдзячнасці, зафіксаваная ў архіўных дакументах і асабістых рэліквіях.

Ігар Анатольевіч Шарамет — расійскі вучоны, доктар тэхнічных навук, прафесар, акадэмік Расійскай акадэміі навук, унёс значны ўклад у развіццё інфармацыйных тэхналогій, сістэмнага аналізу, штучнага інтэлекту і кібербяспекі. Да пачатку навуковай кар’еры прайшоў службу ў Узброеных сілах СССР, дзе атрымаў афіцэрскае званне. Армейская дысцыпліна стала трывалай асновай яго будучых дасягненняў. На выставе прадстаўлены яго лісты да маці, напоўненыя павагай і пяшчотай, а таксама фотаздымкі розных гадоў, што адлюстроўваюць шлях станаўлення асобы — ад хлопчыка з дапытлівым позіркам да вучонага сусветнага ўзроўню.

Уладзімір Міхайлавіч Калачык — Герой Сацыялістычнай Працы, кандыдат эканамічных навук, дэпутат Вярхоўнага Савета СССР і БССР, прысвяціў жыццё развіццю сельскай гаспадаркі Беларусі. Пад яго кіраўніцтвам калгас «Светлы шлях» стаў узорам эфектыўнасці і сацыяльнай адказнасці. За працоўнымі подзвігамі стаіць чалавек, глыбока адданы сям’і. У архіве захоўваюцца фотаздымкі з жонкай, дзецьмі — жывыя сведчанні любові і клопату, якія ён пранёс праз усё жыццё. Гэтыя вобразы нагадваюць: сапраўдная сіла нараджаецца дома, сярод родных.

Аляксандр Аляксандравіч Хозяінін — падпалкоўнік запасу, заслужаны журналіст Беларусі, лаўрэат прэміі Саюза журналістаў, больш за 40 гадоў служыў слову і людзям. Як галоўны рэдактар «Маладзечанскай газеты», ён фарміраваў грамадскую думку, раскрываў лёсы, абараняў праўду. Афіцэрскае мінулае выхавала ў ім павагу да чалавека, а сямейныя каштоўнасці — чуллівасць і дабрыню. На выставе прадстаўлены яго юнацкія фотаздымкі, здымкі сына і маці. Яго гісторыя — гэта напамін, што журналістыка пачынаецца з любові да людзей.

Выстава ў архіве Маладзечна — шчырая размова пра тое, што за кожным дасягненнем — сям’я, за кожным дакументам — пачуцці, за кожным фотаздымкам — памяць. Гэта запрашэнне ўспомніць сваіх родных, сказаць ім «дзякуй» і захаваць цяпло сямейных сувязяў.

1-7. Знаёмства з выставай