Тэматычная сустрэча «Вытокі беларускага кіно. Архівы»

20 сакавіка 2025 г. у малой зале кінатэатра «Піянер» (г. Мінск) адбылася тэматычная сустрэча «Вытокі беларускага кіно. Архівы», прысвечаная юбілеям заснавальнікаў беларускага кіно – Ю.В.Тарыча і У.У.Корш-Сабліна. Яна была арганізавана супольнымі намаганнямі Беларускага дзяржаўнага архіва-музея літаратуры і мастацтва (далей БДАМЛМ), кінастудыі «Летапіс» і адміністрацыі кінатэатра «Піянер» з мэтай патрыятычнага выхавання моладзі, папулярызацыі гісторыі кіно і знаёмства з дзейнасцю архіваў як захавальнікаў нацыянальнай памяці. Тэматычная сустрэча – комплекснае мерапрыемства, якое дазваляе выкарыстоўваць розныя падыходы для прыцягнення ўвагі, наладжвання супрацоўніцтва і, галоўнае, яго далейшага развіцця. У дадзеным выпадку, праграма ўключала архіўную прэзентацыю, круглы стол экспертаў і сумесны прагляд дакументальнага фільма. Удзельнікамі сталі не толькі спецыялісты ў галінах архівазнаўства і кіназнаўства, але таксама прадстаўнікі сродкаў масавай інфармацыі, мінскія школьнікі – аматары беларускага кіно і студэнты Беларускай дзяржаўнай акадэміі мастацтваў.

Вядучым і мадэратарам выступіла дырэктар БДАМЛМ А.А.Макаранка. З прывітальнымі словамі да ўдзельнікаў звярнуўся вядомы беларускі кінарэжысёр Ю.І.Цімафееў і праз відэаканферэнцыю – галоўны рэдактар студыі «Казахфільм» Бекбулат Шэкераў. Вядучы навуковы супрацоўнік аддзела інфармацыі, публікацыі і выкарыстання дакументаў БДАМЛМ Д.С.Самахвалаў прадставіў электронную прэзентацыю дакументаў Ю.В.Тарыча і У.У.Корш-Сабліна ў сховішчах архіва-музея і патлумачыў прысутным вызначальную ролю беларускіх архіваў у вывучэнні гісторыі кіно.

Спікеры круглага стала загадчыца аддзела экранных мастацтваў Цэнтра даследавання беларускай культуры, мовы і літаратуры Нацыянальнай акадэміі навук Беларусі А.А.Карпілава і чалец Прэзідыўма Беларускага саюза кінематаграфістаў В.А.Сцяпанава падзяліліся ўспамінамі і думкамі пра асаблівасці развіцця беларускага кіно, актуальнасці супрацоўніцтва даследчыкаў, кінатворцаў і педагогаў з архівамі, у прыватнасці з БДАМЛМ. Архівісты і кіназнаўцы абмеркавалі дыскусійныя праблемы гісторыі кіно і важнасць іх далейшай міждысцыплінарнай і міжгаліновай распрацоўкі, адказалі на пытанні журналістаў і маладых удзельнікаў сустрэчы. Дакументальны фільм «Трэст, які не лопнуў», прысвечаны стагоддзю беларускага кіно, завершыў мерапрыемства.

Важным вынікам сустрэчы сталі не толькі сумесныя абмеркаванні, але і надзвычай станоўчае ўражанне ўдзельнікаў. Ужо пасля завяршэння А.А.Макаранка і прысутныя работнікі БДАМЛМ атрымалі шматлікія вусныя падзякі ад кінематаграфістаў, школьнікаў і студэнтаў.

1. Вядучы і мадэратар тэматычнай сустрэчы дырэктар БДАМЛМ А.А.Макаранка

2. Падчас правядзення тэматычнай сустрэчы «Вытокі беларускага кіно. Архіў»

3. Вядучы навуковы супрацоўнік аддзела інфармацыі, публікацыі і выкарыстання дакументаў БДАМЛМ Д.С.Самахвалаў

4. Спікер круглага стала В.А.Сцяпанава

5. Спікер круглага стала А.А.Карпілава