Прэзентацыя выставы да 95-годдзя Расціслава Янкоўскага ў БДАМЛМ

Апублікавана: 7 лютага 2025 г.

5 лютага 2025 года ў Беларускім дзяржаўным архіве-музеі літаратуры і мастацтва (далей – БДАМЛМ) адбылася прэзентацыя выставы «У святле рампы: больш за паўстагоддзя на тэатральнай сцэне…», прысвечанай 95-годдзю выбітнага акцёра, народнага артыста СССР Расціслава Іванавіча Янкоўскага.

Экспазіцыю прадставіла вядучы архівіст Таццяна Аляксандраўна Анпілогава. Экспанатамі сталі матэрыялы з асабістага фонду акцёра – фатаграфіі ў ролях, тэксты роляў, выкананыя акцёрам; фатаграфіі сцэн са спектакляў і кіно з яго ўдзелам; успаміны і рэцэнзіі; ганаровыя граматы, падзякі, віншаванні дзяржаўных устаноў і афіцыйных асоб Беларусі і Расіі.

На мерапрыемстве прысутнічалі прыхільнікі таленту Расціслава Іванавіча, яго калегі і сябры. Сярод ганаровых гасцей прысутнічалі мастацкі кіраўнік Нацыянальнага акадэмічнага драматычнага тэатра імя М. Горкага (далей – НАДТ ім.Горкага) Сяргей Кавальчык, акцёры, якія працавалі з Янкоўскім на адной сцэне: Ганна Маланкіна, Аксана Лясная, Вераніка Пляшкевіч і Андрэй Сенькін. Ушанавалі памяць акцёра і блізкія сябры сям’і: кіназнаўца, у мінулым дырэктар Мінскага міжнароднага кінафестывалю «Лістапад» Валянціна Аляксееўна Сцяпанава, загадчык музычнай часткі НАДТ ім. Горкага Аляксей Еранькоў і рэжысёр-пастаноўшчык Валянціна Еранькова.

З прывітальным словам выступіла дырэктар БДАМЛМ Алена Аляксандраўна Макаранка. Яна распавяла аб супрацоўніцтве архіва з сям’ёй Янкоўскіх і падкрэсліла ўнікальнасць прадстаўленых на выставе матэрыялаў.

Вечар прайшоў у цёплай, душэўнай атмасферы. Акцёры дзяліліся сваімі ўспамінамі аб сумеснай працы з Расціславам Янкоўскім, распавядалі пра яго выключным таленце, чалавечнасці, пачуцці гумару. Іх словы сталі жывым сведчаннем вялікага ўнёску Расціслава Іванавіча ў беларускае мастацтва і памяці пра яго, як пра выдатнага чалавека.

Выстава ў БДАМЛМ – гэта магчымасць дакрануцца да творчай спадчыны Расціслава Янкоўскага, убачыць рэдкія фатаграфіі, лісты, дакументы, што адлюстроўваюць яго яркае жыццё і талент.

Экспазіцыя адчынена для наведвання ў чытальнай зале БДАМЛМ.