Дакументальная выстава «Барацьба з карупцыяй у БССР»

9 снежня 2024 года ў Міністэрстве юстыцыі Рэспублікі Беларусь адкрылася дакументальная выстава «Барацьба з карупцыяй у БССР», падрыхтаваная Нацыянальным архівам Рэспублікі Беларусь.

Пачынаючы з 2024 года 9 снежня адзначаецца Міжнародны дзень барацьбы з карупцыяй.

Карупцыя – гэта адсутнасць прыстойнасці і сумленнасці службовых асоб (асабліва – схільнасць да хабарніцтва), выкарыстанне службовага становішча для атрымання выгады несумленным шляхам. Карупцыя лічыцца важнай грамадска-палітычнай праблемай, якая зніжае тэмпы эканамічнага росту.

Нягледзячы на тое, што ў эпоху СССР у Крымінальным кодэксе адсутнічала паняцце «карупцыя», сама з’ява мела адносна шырокае распаўсюджванне ў сувязі з праблемай павальнага дэфіцыту. Гэтым карысталіся некаторыя нядобрасумленныя гандлёвыя работнікі, якія прадавалі тавары з-пад падлогі па завышаных цэнах (сведчаннем таму ў некаторай ступені з’яўляецца знакамітая справа гастранома «Елiсеяўскi»). Не была ў гэтым плане выключэннем і БССР.

У СССР існавала сістэма размеркавання бясплатнага жылля, што праходзіла далёка не ў празрыстых і роўных умовах і стварала ўмовы для шматлікіх злоўжыванняў і хабарніцтва. У падобнай форме вяліся і чэргі на куплю аўтамабіля, мэблі і іншых прэстыжных і дарагіх тавараў, што непазбежна суправаджалася выхадам за рамкі прававога поля. Акрамя таго, назіраліся выпадкі фіктыўнага працаўладкавання на працу найбліжэйшых сваякоў ці знаёмых, што ў выніку сур’ёзна падрывала эканамічную бяспеку краіны.

Разам з тым, паводле ацэнак некаторых даследчыкаў дадзенай тэматыкі, сітуацыя з карупцыяй у БССР была адносна спакойнай, паказчыкі выяўленых злачынстваў – нізкімі, што ў цэлым сведчыла аб эфектыўнай прафілактычнай рабоце мясцовых праваахоўных органаў.

На выставе прадстаўлены дакументы з архіўных фондаў «Цэнтральны камітэт Камуністычнай партыі Беларусі», «Наркамат рабоча-сялянскай інспекцыі БССР», «Камітэт Народнага кантролю БССР» і іншых.

З выставай азнаёміліся супрацоўнікі Міністэрства юстыцыі Рэспублікі Беларусь.

1. Дакументальная выстава «Барацьба з карупцыяй у БССР»

2. Супрацоўнікі Міністэрства юстыцыі Рэспублікі Беларусь знаёмяцца з выставай архіўных дакументаў

3. Супрацоўнікі Міністэрства юстыцыі Рэспублікі Беларусь на выставе

4. Архіўныя дакументы на выставе

5. Архіўныя дакументы на выставе

6. Адкрыццё дакументальнай выставы ў Міністэрстве юстыцыі Рэспублікі Беларусь