БДАМЛМ: да 100-годдзя Васіля Быкава

19 чэрвеня 2024 года, у дзень 100-годдзя празаіка, публіцыста, драматурга, народнага пісьменніка Беларусі Васіля Уладзіміравіча Быкава (19.06.1924-22.06.2003), калектыў Беларускага дзяржаўнага архіва-музея літаратуры і мастацтва (далей – БДАМЛМ) далучаецца да ўшанавання знакавай постаці ў беларускай і сусветнай літаратуры.

Пісьменнік-франтавік, выдатны мастак слова, Васіль Быкаў вывеў беларускую антываенную літаратуру на сусветны ўзровень. Найвялікшая ступень мастацкай праўдзівасці, глыбіня пранікнення ў таямніцы народнай і чалавечай псіхалогіі прынеслі творам Быкава абсалютнае прызнанне сярод чытачоў розных краін. Чалавечае вымярэнне ваенным падзеям – праз боль, смерць сяброў, напружанне боя, стогны і крыкі раненых – робіць прозу Быкава зразумелай і блізкай ва ўсе часы.

БДАМЛМ захоўвае багаты на дакументы фонд пісьменніка (№ 165), які прыцягвае ўвагу даследчыкаў, журналістаў, грамадскасці. Найбольш цікавыя дакументы (фотаздымкі, ліставанні, публікацыі, сцэнары, рукапісы твораў В. Быкава, прыжыццёвыя і навейшыя выданні яго кніг і інш.) прадстаўлены на спецыяльна падрыхтаванай да юбілею пісьменніка выставе «Сам-насам з вечнасцю».

Дакументы з фонду Васіля Быкава былі выкарыстаны пры стварэнні дакументальнага фільма «Судьба отмерила нам непомерно», за што стваральнікі фільма выказалі падзяку БДАМЛМ і асабіста дырэктару Алене Аляксандраўне Макаранка. Фільм быў паказаны ў першыя хвіліны юбілейнага дня – 19 чэрвеня 2024 года.

Фота: BGAMLI_LA_165_2_102_004