Экскурсіі, прэзентацыі і цікавасць грамадзян з іншых краін: у ЗГА ў г.Маладзечне правялі Міжнародны тыдзень архіваў

Апублікавана: 13 чэрвеня 2024 г.

З 5 па 9 чэрвеня архіўная супольнасць адзначыла Міжнародны тыдзень архіваў. Яе мэта – захаванне і развіццё сусветнай архіўнай спадчыны, а таксама прыцягненне ўвагі шырокай грамадскасці да праблем архівазнаўства. Традыцыйна да святочнага Тыдня прымеркаваны розныя асветніцкія мерапрыемствы і акцыі. Не засталася ўбаку ад іх установа «Занальны дзяржаўны архіў у г.Маладзечне».

Так, архівісты актыўна праводзілі кансультацыі для грамадзян па пытаннях біяграфічнага і генеалагічнага характару. Насычанай была праца ў чытальнай зале архіва: цікавасць да дакументаў, якія захоўваюцца ў фондах, праяўлялі як грамадзяне Беларусі, так і іншых краін. У прыватнасці, пошукам інфармацыі аб сваім родзе цікавіліся госці з Расійскай Федэрацыі, для якіх былі не толькі прадстаўлены неабходныя дакументы, але і праведзена аглядная экскурсія па архіве, ажыццёўлена прэзентацыя найбольш цікавых спраў, якія захоўваюцца ў фондах установы, аказана кансультацыя па рабоце з Даведнікам архіва і не толькі. Карыстальнікі чытальнай залы з краіны-суседкі адзначылі высокую кампетэнтнасць спецыялістаў архіва, зручнасць работы ў чытальнай зале, у тым ліку з дакументамі ў электронным выглядзе.

Традыцыйна на Тыдні гасцямі архіўнай установы сталі і навучэнцы школ горада і раёна. Экскурсія праведзена для выхаванцаў аздараўленчых летніх лагераў ДУА «Хажоўская сярэдняя школа Маладзечанскага раёна» і ДУА «Сярэдняя школа №12 г.Маладзечна», арганізавана прэзентацыя дакументальных выставак «Генацыд беларускага народа ў гады Вялікай Айчыннай вайны», «Вызваленне Беларусі ад нямецка-фашысцкіх захопнікаў». Навучэнцы пазнаёміліся з гісторыяй установы, працай кожнага з аддзелаў архіва, наведалі архівасховішча і чытальную залу, для вучняў быў праведзены майстар-клас па рамонце і рэстаўрацыі спраў. У рамках экскурсіі быў паказаны дакументальны фільм «Вызваленне».

Госці адзначылі важнасць працы, звязанай з захаваннем важных дакументаў і файлаў. А дзейнасць архівістаў патрабуе ўважлівасці, канцэнтрацыі і скрупулёзнасці, ведаў мноства інструкцый, звязаных з тэрмінамі, правіламі і пералікам захоўвання неабходнай інфармацыі.