Аб падпісанні Пагаднення аб супрацоўніцтве паміж установай «Беларускі дзяржаўны архіў кінафотафонадакументаў» і Цэнтрам даследванняў беларускай культуры, мовы і літаратуры Нацыянальнай акадэміі навук Беларусі

Апублікавана: 29 мая 2023 г.

У Цэнтры даследванняў беларускай культуры, мовы і літаратуры Нацыянальнай акадэміі навук Беларусі 26 мая 2023 года адбылося ўрачыстае падпісанне Пагаднення аб супрацоўніцтве паміж установай «Беларускі дзяржаўны архіў кінафотафонадакументаў» (далей – БДАКФФД) і Цэнтрам. Дадзены дакумент замацоўвае ўжо склаўшыеся адносіны дзвюх устаноў па пытаннях навуковых даследванняў у сферы вывучэння і папулярызацыі беларускай экраннай спадчыны, удакладнення і ўдасканалення навукова-даведачнага апарата архіва, атрыбутацыі кінахранікальнага матэрыялу.

У рамках таго ж мерапрыемства супрацоўнікі Цэнтра даследванняў беларускай культуры, мовы і літаратуры Нацыянальнай акадэміі навук Беларусі перадалі ў дар БДАКФФД унікальны кінадакумент «Старажытны беларускі народны тэатр». Зняты ў 1962 годзе ў в.Бялевічы Слуцкага раёна, фільм адносіцца да нешматлікай і маладаследаванай катэгорыі навуковага кіно – навукова-даследчай. Створаны выключна сіламі навукоўцаў, без далучэння прафесійных аператарў і рэжысёраў, а таксама тэлестудыйнай тэхнікі, фільм распавядае аб унікальнай з’яве – нородным лялечным тэатры батлейцы. Дадзены кінадакумент валодае велізарнай навуковай каштоўнасцю. У ім спалучаюцца інтарэсы навукоўцаў самых розных накірункаў: гісторыкаў, этнографаў, фалькларыстаў, тэатразнаўцаў. Несумненна, БДАКФФД захавае гэты фільм для будучых пакаленняў, зробіць сапраўднае народнае мастацтва бліжэй да сучаснікаў, – падвеў вынік сустрэчы дырэктар БДАКФФД А.М.Ганчар.

Загадчык аддзела фарміравання Нацыянальнага архіўнага фонду БДАКФФД Дубатоўка Л.В. падчас выступлення

Старшы навуковы супрацоўнік Рэспубліканскай лабараторыі гісторыка-культурнай спадчыны Цэнтра даследаванняў беларускай культуры, мовы і літаратуры Нацыянальнай акадэміі навук Беларусі, кандыдат мастацтвазнаўства, дацэнт К.І.Рэмішэўскі падчас адкрыцця мерапрыемства

Падпісанне Пагаднення аб супрацоўніцтве (на пярэднім плане злева направа дырэктар БДАКФФД А.М.Ганчар, дырэктар Цэнтра даследаванняў беларускай культуры, мовы і літаратуры Нацыянальнай акадэміі навук Беларусі, акадэмік Нацыянальнай акадэміі навук Беларусі А.І.Лакотка) (аўтар здымкі Ю.Іваноў)