Нефармальны інструктаж: напярэдадні АДI, прысвечанага бяспецы жыццядзейнасці, маладзечанскія архівісты прынялі ўдзел у акцыі АСВОД

У рамках рэспубліканскай прафілактычнай акцыі «Адпачываючы ля вады, памятай, што бацька – ты!» калектыў Занальнага дзяржаўнага архіва ў г.Маладзечна сустрэўся са старшынёй раённай арганізацыі АСВОД Анатолем Пецюшыкам.

Здавалася б, лозунг акцыі звернуты ў першую чаргу да бацькоў. Аднак прысутныя выдатна разумеюць: кожны супрацоўнік архіва-гэта не толькі прафесіянал, які працуе з дакументамі, але і клапатлівы тата и мама, дзядуля ці бабуля. Менавіта таму размова аб дзіцячай бяспецы, правілах паводзін на водных аб’ектах і бацькоўскай адказнасці прагучала асабліва востра. Анатоль Пецюшык нагадаў архівістам аб непарушных правілах бяспекі і падкрэсліў: ля вады ні на хвіліну нельга губляць з-пад увагі дзяцей.

Госць агучыў лічбы рэспубліканскай статыстыкі, якія, на жаль, застаюцца трывожнымі: вада не даруе бестурботнасці. Аднак на фоне агульнарэспубліканскай карціны ёсць і падстава для гонару: у Маладзечанскім раёне ў бягучым купальным сезоне выпадкаў гібелі людзей на вадзе не дапушчана.

Расслабляцца рана. Старшыня райасвода прывёў прыклады нядаўніх эпізодаў выратавання тапельцаў у нашым раёне, калі менавіта пільнасць і пісьменныя дзеянні відавочцаў дапамагалі пазбегнуць трагедыі.

Анатоль Пецюшык таксама нагадаў прысутным пра пяць афіцыйна абсталяваных і бяспечных месцах для купання ў раёне. Ужо ў бліжэйшых перспектывах-добраўпарадкаванне яшчэ аднаго пляжу на маляўнічым беразе ракі Уша.

Гэтая сустрэча была важная не проста як фармальны інструктаж. За працоўнымі сталамі архіва сядзяць звычайныя людзі. Зачыніўшы змену, адправіўшыся на выхадныя на дачу, на рыбалку ці проста вырашыўшы выкупацца з сям’ёй, яны, як і ўсе, могуць сутыкнуцца з бытавымі рызыкамі на вадзе. Вада не глядзіць на прафесію, стаж або адукацыю і не шкадуе тых, хто губляе пільнасць.

Галоўны пасыл сустрэчы аказаўся простым і жыццёва важным: беражыце сябе і сваіх блізкіх. Хай гісторыя, якую так беражліва захоўваюць архівісты, папаўняецца толькі добрымі падзеямі, а лета прынясе радасць бяспечнага і здаровага адпачынку! Хай надвор’е не падвядзе!

1-3. Падчас мерапрыемства