Правядзенне Дня адчыненых дзвярэй ва ўстанове «Дзяржаўны архіў Магілёўскай вобласці», прысвечанай Міжнароднаму дню архіваў

Навучэнцы УА «Магілёўскі дзяржаўны эканамічны прамыслова-тэхналагічны каледж» ўпершыню наведалі ўстанову «Дзяржаўны архіў Магілёўскай вобласці» ў рамках Дня адчыненых дзвярэй, прымеркаванага да Міжнароднага дня архіваў.

Праграма Дня была насычанай і дазволіла гасцям поўнасцю пагрузіцца ў атмасферу архіўнай службы.

Навучэнцы з экскурсіяй пабывалі ў архівасховішчы, дзе даведаліся, як забяспечваецца строгі тэмпературна-вільготны рэжым, як уладкованыя мабільныя стэлажы і як захоўваюцца дакументы з унікальнай гістарычнай каштоўнасцю.

Потым увазе гасцей была прадстаўлена экспазіцыя рэдкіх дакументаў. Асаблівую цікавасць выклікалі фільтрацыйна-праверачныя справы грамадзян, прымусова сагнаных у Германію ў гады Вялікай Айчыннай вайны, а таксама пасляваенныя нумары абласной газеты «За Радзіму», якія змяшчаюць інфармацыю аб аднаўленні мірнага жыцця ў Магілёве і вобласці.

У чытальнай зале адбылася размова на тэму генеалагічных даследаванняў. Архівісты распавялі, з якіх фондаў пачынаць пошук радаводу, як правільна працаваць з вопісамі і базамі дадзеных.

Мерапрыемства завяршылася праглядам дакументальнага фільма «Крэпасць-герой», падрыхтаванага Беларускім дзяржаўным архівам кінафотафонадакументаў.

Дзень адчыненых дзвярэй – гэта выдатная магчымасць паказаць, што архіў з’яўляецца сучасным, даступным і адкрытым інфармацыйным цэнтрам, які прываблівае не толькі прафесійных даследчыкаў, але моладзь.

1. Навучэнцы УА «Магілёўскі дзяржаўны эканамічны прамыслова-тэхналагічны каледж» разглядаюць падшыўку абласной газеты «За Радзіму»

2. Вядучы архівіст аддзела навуковага выкарыстання дакументаў і інфармацыі Аляксей Швыроў дэманструе навучэнцам копію фільтрацыйна-паверачнай справы

3. Навучэнцы УА «Магілёўскі дзяржаўны эканамічны прамыслова-тэхналагічны каледж» разглядаюць стэндавую выставу архіўных дакументаў

4. Навучэнцы знаёмяцца з працэсам аблічбоўкі дакументаў

5. Падчас прагляду дакументальнага фільма «Крэпасць-герой»

6. Калектыўнае фота навучэнцаў «Магілёўскі дзяржаўны эканамічны прамыслова-тэхналагічны каледж» у архівасховішчы №1