Прафесійная сустрэча кіраўнікоў дзяржаўных архіўных службаў і архіўных устаноў Рэспублікі Беларусь і Расійскай Федэрацыі

2 кастрычніка 2025 г. у 2-гі дзень форуму кіраўнікоў дзяржаўных архіўных службаў і архіўных устаноў Рэспублікі Беларусь і Расійскай Федэрацыі праца працягнулася ў г.Рэчыцы.

Перад пачаткам прафесійнай сустрэчы дэлегацыі архівістаў Беларусі і Расіі наведалі Занальны дзяржаўны архіў у г.Рэчыцы, дзе азнаёміліся з умовамі захоўвання дакументаў і сучаснымі падыходамі да забеспячэння захаванасці фондаў. Гасцям былі прадстаўлены праекты па алічбоўцы дакументаў, якія рэалізуюцца архівам, а таксама новыя формы ўзаемадзеяння з карыстальнікамі.

Пасля наведвання архіва праца форуму працягнулася ў Палацы культуры «Нафтавік», дзе адбылося абмеркаванне пытанняў аб арганізацыі прадстаўлення і выкарыстання лічбавых копій архіўных дакументаў у глабальнай камп’ютарнай сетцы Інтэрнэт.

На адкрыццё мерапрыемства дырэктар Дэпартамента па архівах і справаводстве Алег Леанідавіч Воінаў адзначыў, што тэма сённяшняй сустрэчы вельмі актуальная, яе граматная рэалізацыя з’яўляецца дзейсным інструментам інфармацыйна-ідэалагічнай і культурна-асветніцкай работы, якая праводзіцца намі.

У ходзе сустрэчы разгледжаны актуальныя пытанні лічбавай трансфармацыі архіўнай справы:

дырэктар Беларускага цэнтра лічбавізацыі архіўнай дзейнасці Дзяніс Валянцінавіч Шаброў далажыў аб праектах, якія рэалізуюцца на інтэрнет-рэсурсе «Архівы Беларусі»;

начальнік аддзела міжархіўных інфармацыйных камунікацыйных праектаў Росархіва Наталля Васільеўна Глішчынская расказала пра міжархіўныя ініцыятывы на партале «Архівы Расіі»;

дырэктар Беларускага дзяржаўнага архіва кінафотафонадакументаў Андрэй Мікалаевіч Ганчар падзяліўся вопытам прасоўвання інфармацыйна-асветніцкіх праектаў і выкарыстання відэасюжэтаў у сетцы Інтэрнэт;

дырэктар Дзяржаўнага архіва Расійскай Федэрацыі Ларыса Аляксандраўна Рогава прадставіла практыку стварэння і далейшага выкарыстання лічбавых копій дакументаў;

дырэктар Нацыянальнага архіва Рэспублікі Беларусь Андрэй Канстанцінавіч Дземянюк прэзентаваў сумесны беларуска-расійскі зборнік архіўных дакументаў «Нацысцкія карныя аперацыі ў беларуска-расійскім прыграніччы. Жнівень 1942 – студзень 1943 гг.», падрыхтаваны і ў лічбавым фармаце.

Адмысловая ўвага ўдзельнікаў сустрэчы была нададзена пытанням, звязаным з пашырэннем доступу да архіўных дакументаў у сетцы Інтэрнэт, а таксама папулярызацыі гісторыка-дакументальнай спадчыны сярод школьнікаў і студэнтаў у рамках асветніцкіх праектаў.

Удзельнікі форуму адзначылі, што толькі аб’ядноўваючы намаганні ў галіне цыфравізацыі архіўнай справы, можна забяспечыць захаванне гістарычнай праўды і перадачу яе будучым пакаленням.

1-4. Удзельнікі форуму ў Занальным дзяржаўным архіве ў г.Рэчыцы.

5-8. Прафесійная сустрэча кіраўнікоў дзяржаўных архіўных службаў і архіўных устаноў Рэспублікі Беларусь і Расійскай Федэрацыі.