Віртуальная выстава БДАМЛМ «Рэха пачаткаў: Ю.В.Тарыч і У.У. Корш-Саблін – стваральнікі беларускага ігравога кіно»

24 студзеня 2025 года споўнілася 140 гадоў з дня нараджэння Юрыя Віктаравіча Тарыча (1885 – 1967). 29 сакавіка 2025 года споўніцца 125 гадоў з дня нараджэння Уладзіміра Уладзіміравіча Корш-Сабліна (1900 – 1974). Яны шырока вядомы як рэжысёры, заснавальнікі беларускага ігравога кіно.

У 1926 г.творчы калектыў на чале Ю.В.Тарыча, у які ў якасці памочніка рэжысёра і акцёра ўваходзіў У.У.Корш-Саблін, зняў першы беларускі нацыянальны кінафільм «Лясная быль» па аповесці М.Чарота «Свінапас». Пазней абодвы рэжысёры актыўна супрацоўнічалі з кінафабрыкай «Савецкая Беларусь» у Ленінградзе і студыяй «Беларусьфільм» у Мінску. У.У.Корш-Саблін у 1945 – 1960 гг. і 1969 – 1974 гг. займаў пасаду мастацкага кіраўніка студыі, быў найбольш уплывовым рэжысёрам. Ю.В.Тарыч стаў стваральнікам не толькі беларускага, але таксама татарскага і мангольскага нацыянальнага кіно. Творчыя шляхі рэжысёраў-заснавальнікаў былі няпростымі, але дзякуючы іх намаганням беларускі кінематограф набыў свой голас і стаў неад’емнай часткай беларускай і сусветнай культуры.

Для тых, хто жадае пазнаёміцца з дакументамі Ю.В.Тарыча і У.У.Корш-Сабліна ў фондах Беларускага дзяржаўнага архіва-музея літаратуры і мастацтва, была падрыхтавана віртуальная выстава «Рэха пачаткаў: Ю.В.Тарыч і У.У.Корш-Саблін – стваральнікі беларускага ігравога кіно». Паглядзець яе можна па спасылцы.