Дакументальная выстава «Бярэзінскі запаведнік: 100 гадоў захоўваючы будучыню», прысвечаная 100-годдзю Бярэзінскага біясфернага запаведніка

Апублікавана: 4 лютага 2025 г.

31 студзеня 2025 г. у Нацыянальным архіве Рэспублікі Беларусь адбылося адкрыццё выставы «Бярэзінскі запаведнік: 100 гадоў захоўваючы будучыню».

Арганізатарамі праекта выступілі: Нацыянальны архіў Рэспублікі Беларусь (далее – НАРБ), Беларускі дзяржаўны архіў кінафотафонадакументаў, Дзяржаўная ўстанова «Бярэзінскі біясферны запаведнік», Нацыянальны гістарычны музей Рэспублікі Беларусь, Музей прыроды і экалогіі Беларусі, часопіс «Родная прырода».

Бярэзінскі біясферны запаведнік – жамчужына беларускага Паазер’я. Ён з’яўляецца адным з найстарэйшых і найпрыгажэйшых куткоў прыроды Рэспублікі Беларусь.

З першых гадоў існавання БССР кіраўніцтва рэспублікі, навукоўцы, грамадскасць ўсвядомілі значнасць гэтага ўнікальнага прыроднага комплексу. 30 студзеня 1925 г. урад Беларусі прыняў рашэнне аб стварэнні Бярэзінскага запаведніка. На яго тэрыторыі забаранілі паляванне, лоўлю рыбы, высечку і сплаў лесу, пачаліся сур’ёзныя навуковыя даследаванні флоры і фауны.

Бярэзінскі біясферны запаведнік вядомы не толькі ў нашай краіне, але і за яе межамі. З 1979 г. ён знаходзiцца ў сусветнай сетцы біясферных рэзерватаў праграмы ЮНЕСКА «Чалавек і біясфера», а таксама ў шматлікіх еўрапейскіх арганізацыях, якія ахоўваюць прыродаахоўныя тэрыторыі.

З прывітальным словам да гасцей і ўдзельнікаў выставы звярнуліся намеснік дырэктара Дэпартамента па архівах і справаводстве Міністэрства юстыцыі Рэспублікі Беларусь А.Я.Цвяткоў і дырэктар дзяржаўнай прыродаахоўнай установы «Бярэзінскі біясферны запаведнік» А.М.Пракошын. Яны падкрэслілі важнасць правядзення работы па захаванні прыроды, адзначылі важнасць захавання і папулярызацыі дакументаў па гісторыі запаведніка.

У адкрыцці выставы прынялі ўдзел і выступілі: начальнік аддзела прыродных комплексаў і прамысловай вытворчасці Упраўлення справамі Прэзідэнта Рэспублікі Беларусь А.А.Сурта; дырэктар па навуковай рабоце Інстытута эксперыментальнай батанікі імя У.Ф.Купрэвіча Нацыянальнай акадэміі навук Беларусі Р.У.Цвірка; загадчык сектара запаведнай справы Навукова-практычнага цэнтра Нацыянальнай акадэміі навук Беларусі па біярэсурсах У.У.Усцін; намеснік дырэктара па навукова-даследчай рабоце Бярэзінскага біясфернага запаведніка У.С.Іўковіч; загадчык музея прыроды І.А.Куракевіч; галоўны рэдактар часопіса «Родная прырода» А.П.Паршына.

Дырэктар НАРБ А.К.Дземянюк уручыў копіі архіўных дакументаў дырэктару запаведніка А.М.Пракошыну і галоўнаму рэдактару часопіса А.П.Паршынай.

На выставе прадстаўлены пудзілы жывёл, якія былі зроблены больш за паўстагоддзя таму, а таксама сабраны ў 50-я гады мінулага стагоддзя гербарый рэдкіх раслін з Бярэзінскага запаведніка, фатаграфіі вядомага беларускага фотамайстра Д.Іўковіча, а таксама дакументы Нацыянальнага архіва Рэспублікі Беларусь, якія адлюстроўваюць гісторыю запаведніка: арганізацыйна-распарадчыя дакументы вышэйшых органаў дзяржаўнай улады і кіравання, прысвечаныя яго стварэнню і развіццю, лісты і справаздачы беларускіх навукоўцаў і практыкаў, якія праводзілі навуковыя даследаванні ў запаведніку, а таксама акты аб шкодзе, прычыненым запаведніку ў гады Вялікай Айчыннай вайны нямецка-фашысцкімі захопнікамі.

Завяршылася святочнае мерапрыемства выступленнем навучэнцаў СШ №77 г.Мінска і чаяваннем з траў, сабраных на тэрыторыі запаведніка.

1. Афіша выставы

2. Удзельнікі ўрачыстага адкрыцця выставы

3. Намеснік дырэктара Дэпартамента па архівах і справаводстве Міністэрства юстыцыі Рэспублікі Беларусь А.Я.Цвяткоў выступае з прывітальным словам

4. Выступленне намесніка па навуковай рабоце Інстытута эксперыментальнай батанікі імя В.Ф.Купрэвіча Нацыянальнай акадэміі навук Беларусі Р.В Цвіркі

5. А.К.Дземянюк., А.М.Пракошын, В.С.Іўковіч, Д.Г.Грумо, В.В.Усцін на адкрыцці выставы

6. Відэавіншаванні супрацоўнікаў запаведнікаў Расійскай Федэрацыі

7. Выступленне навучэнцаў СШ №77 г.Мінска

8. Экспанаты выставы

9. Экспанаты выставы

10. Экспанаты выставы

11. Экспанаты выставы

12. Загадчык аддзела НАРБ М.А.Старасценка з унікальным гербарыем, прадастаўленым Бярэзінскім біясферным запаведнікам

13. Загадчык аддзела НАРБ М.А.Старасценка распавядае аб архіўных дакументах, прадстаўленых на выставе

14. Экспазіцыя выставы

15. Узнагароды Бярэзінскага біясфернага запаведніка на выставе