Дырэктар Дэпартамента па архівах і справаводству Міністэрства юстыцыі Рэспублікі Беларусь і кіраўнікі рэспубліканскіх архіўных устаноў наведалі Смалявіцкі Сацыяльна-педагагічны цэнтр

27 снежня 2024 года ў рамках навагодняй дабрачыннай акцыі «Нашы дзеці» дырэктар Дэпартамента па архівах і справаводству Міністэрства юстыцыі Рэспублікі Беларусь А.Л.Воінаў і сумесна з дырэктарам Беларускага навукова-даследчага інстытута дакументазнаўства і архіўнай справы А.Я.Рыбаковым і дырэктарам Цэнтральнай лабараторыі забеспячэння захаванасці дакументаў Нацыянальнага архіўнага фонду Рэспублікі Беларусь У.Л.Клюйко наведалі дзяржаўную ўстанову адукацыі «Смалявіцкі сацыяльна-педагагічны цэнтр».

Удзел у дабрачыннай акцыі для кіраўніцтва Дэпартамента і дзяржаўных архіўных устаноў з’яўляецца добрай традыцыяй, падобныя сустрэчы з дзецьмі Смалявіцкага сацыяльна-педагагічнага цэнтра праводзяцца штогод. Дадзены Цэнтр аказвае сацыяльна-педагагічную, псіхалагічную і іншыя віды дапамогі дзецям, якія апынуліся ў экстрэмальных жыццёвых сітуацыях.

На сённяшні дзень у Цэнтры знаходзяцца непаўналетнія выхаванцы, якія для сваіх гасцей падрыхтавалі яркую святочную праграму, прысвечаную надыходзячаму Новаму 2025 году.

Дырэктар Дэпартамента ад усяго сэрца павіншаваў дзяцей і педагагічны калектыў Цэнтра з надыходзячымі святамі, пажадаў ім моцнага здароўя, здзяйснення ўсіх запаветных жаданняў, цікавых адкрыццяў, радасці, каб кожны з іх адчуў чараўніцтва свята.

Прадстаўнікі Дэпартамента і дзяржаўных архіўных устаноў, а таксама іншых шэфскіх арганізацый уручылі дзецям падарункі, у тым ліку наборы прысмакаў. У якасці спонсарскай дапамогі архівісты перадалі цэнтру шматфункцыянальную прыладу, а ў бібліятэку сацыяльна-педагагічнай установы – кнігі з дзіцячай серыі «Партызанскі архіў».

У рамках службовай паездкі ў Смалявіцкі раён дырэктар Дэпартамента наведаў дзяржаўную ўстанову «Смалявіцкі раённы архіў». У архіве на захаванні знаходзіцца 10065 спраў у складзе 560 фондаў. Толькі за 11 месяцаў 2024 года работнікамі архіва выканана больш за 420 запытаў сацыяльна-прававога характару.

А.Л.Воінаў азнаёміўся з умовамі захоўвання дакументаў у архіве. Падчас гутаркі з дырэктарам архіва Н.П.Масюкевіч былі абмеркаваны пытанні ўмоў працы работнікаў архіва, іх сацыяльнай абароненасці. Асаблівая ўвага была звернута на неабходнасць арганізацыі ў 2025 годзе работы па экспертызе каштоўнасці дакументаў, якія захоўваюцца ў архіве, адбору найбольш каштоўных дакументаў для перадачы ў Дзяржаўны архіў Мінскай вобласці, выдзялення да знішчэння дакументаў з мінуўшымі тэрмінамі захоўвання.

1. Падчас святочнага прадстаўлення выхаванцаў Цэнтра

2. А.Л.Воінаў і калегі-архівісты віншуюць выхаванцаў Цэнтра з надыходзячымі святамі

3. Агульная фатаграфія ўдзельнікаў навагодняга мерапрыемства

4. Дырэктар Дэпартамента А.Л.Воінаў і дырэктар раённага архіва Н.П.Масюкевіч падчас абмеркавання прафесійных пытанняў