Аб арганізацыі выставачнай экспазіцыі, прысвечанай 85-годдзю ўтварэння Брэсцкай вобласці

Дзяржаўным архівам Брэсцкай вобласці арганізавана ў Брэсцкім аблвыканкаме стацыянарная дакументальная выставачная экспазіцыя, прысвечаная 85-годдзю ўтварэння Брэсцкай вобласці, якое адзначалася 4 снежня.

Для гэтых мэт у будынку аблвыканкама было выдзелена асобнае памяшканне. На 23 вітрынах прадстаўлена каля 200 архіўных дакументаў, фатаграфій, газетных артыкулаў, якія адлюстроўваюць асноўныя вехі развіцця Брэсцкай вобласці і значныя падзеі ў яе гісторыі.

Аснову экспазіцыі склалі матэрыялы з фондаў Дзяржаўнага архіва Брэсцкай вобласці. Акрамя таго, у экспазіцыю ўключаны дакументы і матэрыялы занальных дзяржаўных архіваў вобласці (у гарадах Баранавічы, Пінску, Кобрыне), Беларускага дзяржаўнага архіва кінафотафонадакументаў, Мемарыяльнага комплексу «Брэсцкая крэпасць-герой», а таксама Дзяржаўнага архіва Расійскай Федэрацыі.

Для афармлення экспазіцыі Брэсцкі абласны краязнаўчы музей і абласная бібліятэка імя М.Горкага прадставілі некалькі музейных прадметаў і кніг адпаведна.

Дакументы размешчаны ў храналагічнай паслядоўнасці, пачынаючы з верасня 1939 г. і да сучаснасці. Кожная вітрына прысвечана пэўнаму перыяду ў гісторыі вобласці (верасень 1939 г.– чэрвень 1941 г., перыяд нямецка-фашысцкай акупацыі, генацыд мірнага насельніцтва Брэстчыны ў гады вайны, аднаўленне мірнага жыцця ў 1944-1949 гг., развіццё вобласці ў 1950-я, 1960-я, 1970-я, у 1980-1991 гг., у перыяд суверэннай Рэспублікі Беларусь з 1991 года).

Прадстаўленыя ў экспазіцыі дакументы адлюстроўваюць стан эканомікі, адукацыі, аховы здароўя, культуры, змяшчаюць звесткі аб адміністрацыйна-тэрытарыяльных змяненнях, аб уводзе ў дзеянне прамысловых прадпрыемстваў, аб адкрыцці устаноў адукацыі і культуры, аб развіцці транспартных зносін, аб колькасці насельніцтва вобласці ў розныя гады і многім іншым.

У ліку першых наведвальнікаў экспазіцыі – журналісты, якія бралі ўдзел у прэс-канферэнцыі кіраўніка вобласці Пятра Пархомчыка 2 снежня 2024 г.

3 снежня 2024 г.адбылося ўрачыстае адкрыццё экспазіцыі з удзелам кіраўніцтва вобласці і горада: старшыні Брэсцкага аблвыканкама Пятра Пархомчыка, намеснікаў старшыні аблвыканкама, старшыні Брэсцкага гарвыканкама Сяргея Лабадзінскага і інш.

Мерапрыемства асвятлялася сродкамі масавай інфармацыі.

1. Агульны выгляд экспазіцыі

2. Агульны выгляд экспазіцыі

3. Дырэктар Дзяржаўнага архіва Брэсцкай вобласці Ганна Карапузава знаёміць з экспазіцыяй журналістаў Брэсцкай вобласці

4. Дырэктар Дзяржаўнага архіва Брэсцкай вобласці Ганна Карапузава знаёміць з экспазіцыяй журналістаў Брэсцкай вобласці

5. Старшыня Брэсцкага аблвыканкама Пётр Пархомчык і іншыя ганаровыя госці знаёмяцца з выстаўкай

6. Старшыня Брэсцкага аблвыканкама Пётр Пархомчык і іншыя ганаровыя госці знаёмяцца з выстаўкай