Прэзентацыя ілюстраванага зборніка дакументаў «Операция «Багратион». Партизаны белорусской земли…»

22 чэрвеня 2024 г., у Дзень памяці і смутку, у Мемарыяльным комплексе «Брэсцкая крэпасць-герой» адбылася прэзентацыя кнігі «Операция «Багратион». Партизаны белорусской земли…», прысвечанай 80-годдзю вызвалення Беларусі ад нямецка-фашысцкіх захопнікаў.

Гэта выданне было рэалізавана ў межах праекта бібліятэкі Саюзнай дзяржавы. У падрыхтоўцы дадзенага зборніка непасрэдны ўдзел прынялі архівісты Нацыянальнага архіва Рэспублікі Беларусь (НАРБ), Беларускага дзяржаўнага архіва кінафотафонадакументаў, Беларускага дзяржаўнага архіва навукова-тэхнічнай дакументацыі, расійскія калегі з Цэнтральнага архіва Міністэрства абароны Расійскай Федэрацыі.

Асобая ўвага ў кнізе была нададзена гісторыі беларускага партызанскага руху. У гады акупацыі больш за 374 тысячы беларускіх партызан супрацьстаялі акупантам, падрывалі варожыя эшалоны з тэхнікай і боепрыпасамі, здабывалі каштоўную разведвальную інфармацыю. У кнігу ўвайшла значная колькасць неапублікаваных раней архіўных дакументаў: загады, распараджэнні, дырэктывы, шыфратэлеграмы, радыёграмы, планы, справаздачы, дакладныя запіскі. Аснову кнігі склалі дакументы з фонда Беларускага штаба партызанскага руху, а таксама матэрыялы з «партызанскіх» фондаў, якія захоўваюцца ў НАРБ.

У прывітальным слове Дзяржаўны сакратар Саюзнай дзяржавы Д.Ф.Мезенцаў адзначыў, што ў цяперашні час супраць Беларусі і Расіі ідзе мэтанакіраваная палітыка па перапісванні гістарычнай праўды. У сувязі з гэтым, выданне падобнага зборніка дакументаў з’яўляецца значным укладам у захаванне гістарычнай праўды.

Намеснік Старшыні Савета Федэрацыі К.І.Касачоў распавёў пра праект «Поезд памяти», які стартаваў нядаўна. У акцыі прымаюць удзел 145 школьнікаў – пераможцаў алімпіяд і конкурсаў па тэматыцы Вялікай Айчыннай вайны, якія паспяхова прайшлі адбор, з Расіі, Азербайджана, Арменіі, Казахстана, Кіргізіі, Таджыкістана і Узбекістана.

Намеснік старшыні Дзяржаўнай Думы Федэральнага сходу Расійскай Федэрацыі Г.Ю.Кузнецова адзначыла вялікую важнасць і значнасць прэзентуемага выдання для патрыятычнага выхавання маладога пакалення.

Памочнік Прэзідэнта Рэспублікі Беларусь – інспектар па Брэсцкай вобласці В.П.Вакульчык адзначыў высокі навуковы ўзровень прэзентуемага зборніка. Ён указаў на важнасць выкарыстання архіўных матэрыялаў у барацьбе са спробамі фальсіфікацыі гісторыі.

Намеснік міністра юстыцыі Рэспублікі Беларусь А.М.Кот адзначыў вялікую ролю архіваў у папулярызацыі гістарычнай праўды, а намеснік дырэктара Дэпартамента па архівах і справаводству А.Я.Цвяткоў падкрэсліў важнасць узаемадзеяння ў выдавецкіх праектах Саюзнай дзяржавы і архіўных устаноў.

1. С.В.Кулінок, А.К.Дземянюк, А.М.Кот і А.Я.Цвяткоў у г.Брэсце.

2. В.П.Вакульчык, Д.Ф.Мезенцаў і Г.Ю.Кузнецова падчас прэзентацыі зборніка дакументаў.

3. Намеснік Міністра юстыцыі Рэспублікі Беларусь А.М.Кот.