Аб сумесным праекце Беларускага дзяржаўнага архіва навукова-тэхнічнай дакументацыі і «Музея «Замкавага комплексу» Мір»
З 22 чэрвеня па 20 ліпеня 2024 года ў інфармацыйна-касавай зале музея «Замкавы комплекс «Мір» пройдзе выстава фатаграфій, прымеркаваная да 80-годдзя вызвалення Беларусі ад нямецка-фашысцкіх захопнікаў. Гэта сумесны выставачны праект Федэральнай дзяржаўнай бюджэтнай установы культуры «Дзяржаўны навукова-даследчы музей архітэктуры імя А.У. Шчусева», установы «Беларускі дзяржаўны архіў навукова-тэхнічнай дакументацыі», прыватных архіваў і Установы «Музей «Замкавы комплекс «Мір».
Дата пачатку выставы выбрана не выпадкова: 22 чэрвеня 1941 года – адна з самых сумных дат у нашай гісторыі, пачатак Вялікай Айчыннай вайны. Гэты дзень нагадвае пра ўсіх загінулых, закатаваных у фашысцкай няволі, якія памерлі ў тыле ад голаду і нягод. На шосты дзень вайны, 27 чэрвеня 1941 года, быў акупаваны пасёлак Мір. Тры гады акупацыі, генацыду і цяжкіх баёў, не пакінулі следу ад некалі квітнеючага мястэчка. На момант вызвалення Міра ацалела толькі 20% будынкаў даваеннага перыяду, а колькасць насельніцтва пасёлка скарацілася на 70%, пакінуўшы глыбокі след у памяці тых, хто выжыў.
На выставе «Тут была вайна…» будуць упершыню прадстаўлены ўнікальныя фатаграфіі пасёлка Мір і Мірскага замка часоў Вялікай Айчыннай вайны, а цэнтральнае месца на выставе зоймуць нядаўна набытыя здымкі, якія паказваюць першыя дні вайны ў пасёлку Мір. Яны дадуць магчымасць ацаніць стан пасёлка і злачынствы нямецка-фашысцкіх захопнікаў, а таксама ўбачыць рэальнасць вайны вачыма відавочцаў.
Уваход вольны.
