Супрацоўнікі ўстановы «Дзяржаўны архіў Гродзенскай вобласці» правялі экскурсію для студэнтаў 5 курса філалагічнага факультэта Гродзенскага дзяржаўнага ўніверсітэта імя Янкі Купалы ў рамках акцыі «Архівы – школе»
Супрацоўнікі ўстановы «Дзяржаўны архіў Гродзенскай вобласці» правялі экскурсію для студэнтаў 5 курса філалагічнага факультэта Гродзенскага дзяржаўнага ўніверсітэта імя Янкі Купалы ў рамках акцыі «Архівы – школе».
Будучым філолагам расказалі пра гісторыю стварэння, склад дакументаў і спецыфіку дзейнасці ўстановы, прадставілі зборнікі дакументаў і матэрыялаў, інтэрнет-праекты, падрыхтаваныя пры ўдзеле архіва.
Экскурсантаў пазнаёмілі з выставамі дакументаў «Без тэрміна даўнасці», «Ніхто не забыты, нішто не забыта», прымеркаванымі да Года гістарычнай памяці. Паколькі хлопцы навучаюцца па спецыяльнасці «Рамана-германская філалогія», асаблівую цікавасць у іх выклікалі дакументы на нямецкай мове. У прадстаўленых дакументальных матэрыялах адлюстроўваецца дзейнасць акупацыйных улад на тэрыторыі Гродзенскага павета ў перыяд Вялікай Айчыннай вайны. Гэта і палітыка каланізацыі, якая праводзілася, і барацьба з партызанамі, і адпраўка мірнага насельніцтва ў штрафныя і канцэнтрацыйныя лагеры і многае іншае. Студэнты захоплена вывучалі трафейныя дакументы на нямецкай мове, знаходзілі цікавыя факты і зачытвалі іх услых. Таксама юным лінгвістам паказалі карткі ваеннапалонных, якія знаходзіліся ў нямецкіх лагерах, медыцынскія пасведчанні грамадзян, адпраўленых на працу ў Германію, пасведчанні вязняў гета, анкеты працоўных, паведамленні аб прызыве на працу і інш.
Была праведзена аглядная экскурсія па архіве, падчас якой студэнты наведалі архівасховішча, дзе пазнаёміліся з умовамі захоўвання дакументаў і ўбачылі асабліва каштоўныя архіўныя экзэмпляры, якія з’яўляюцца ўнікальнымі сведчаннямі гістарычнага мінулага Гродзеншчыны.
