Без тэрміну даўнасці. Непакораныя: у рамках міжнароднага медыямарафона архівісты БДАКФФД і занальнага дзяржархіва у г.Маладзечна прэзентавалі свае працы

Апублікавана: 27 сакавіка 2025 г.

У рамках медыямарафона «Без тэрміну даўнасці. Непакароные» 27 сакавіка 2025 года ў кінатэатры «Радзіма» прайшоў кіналекторый з паказам фільмаў кінахронікі «Партызанская Рэспубліка» і «Летапіс эпохі», падрыхтаваных Беларускім дзяржаўным архівам кінафотафонадакументаў. Гледачамі сталі навучэнцы школ г.Маладзечна.

Перад пачаткам кінапаказу перад школьнікамі выступіў намеснік загадчыка аддзела выкарыстання і інфармацыі БДАКФФД Міхаіл Гарэлік, які адзначыў важнасць папулярызацыі архіўных дакументаў. Адзін з фільмаў прысвечаны дзейнасці беларускіх партызан, другі быў падрыхтаваны да 100-годдзя беларускага кіно.

У сваю чаргу, у фае кінатэатра супрацоўнікамі занальнага дзяржархіва была прадстаўлена дакументальная выстава, прысвечаная генацыду беларускага народа на тэрыторыі Маладзечанскага, Вілейскага, Валожынскага і Мядзельскага раёнаў.

«Такія мерапрыемствы, у першую чаргу, накіраваны на фарміраванне маральных каштоўнасцяў і сацыяльнай адказнасці ў моладзі. Захаванне памяці аб генацыдзе беларускага народа ў гады Вялікай Айчыннай вайны – гэта не толькі даніна павагі ахвярам, але і важны крок да ўмацавання міру для будучых пакаленняў» – адзначыла загадчык аддзела выкарыстання і публікацыі дакументаў занальнага дзяржархіва Алена Тамковіч.