Наведванне 30-га міжнароднага інфармацыйна-камунікацыйнага форуму «ТІБО-2024»

05 чэрвеня 2024 года супрацоўнікі сектара ІКТ аддзела аўтаматызаваных архіўных тэхналогій Нацыянальнага архіва Рэспублікі Беларусь наведалі 30-ы Міжнародны інфармацыйна-камунікацыйны форум «ТІБО-2024».

У форуме прынялі ўдзел найбуйнейшыя айчынныя і замежныя вытворцы тэлекамунікацыйнага абсталявання, апаратных сродкаў і праграмнага забеспячэння, кампаніі – аператары мабільнай і фіксаванай сувязі, распрацоўшчыкі і пастаўшчыкі высокатэхналагічных прадуктаў, сістэм бяспекі, інтэлектуальных рашэнняў і сэрвісаў для масавага і карпаратыўнага сегмента. Аўдыторыя «ТІБО» – прадстаўнікі органаў дзяржаўнага кіравання, міжнародных арганізацый і дыпламатычных місій, прафесійных і бізнес-асацыяцый, навукова-даследчых і адукацыйных устаноў, дзяржаўных і прыватных кампаній, сродкаў масавай інфармацыі.

Супрацоўнікі НАРБ азнаёміліся з прадстаўленымі на форуме ўзорамі камп’ютэрнага, перыферыйнага, камутацыйнага і сервернага абсталявання, вывучылі магчымасці найноўшага праграмнага забеспячэння і сродкаў абароны інфармацыі.

Асаблівую цікавасць выклікалі выставачныя ўзоры друкавана-размнажальнай тэхнікі вытворчасці расійскага брэнда «Кацюша», прэзентацыя атэставанага ААЦ цэнтра кібербяспекі беларускага аператара мабільнай сувязі «МТС», шырокафарматныя сканеры барабаннага тыпу вытворчасці KIP, гатовае рашэнне для інтэграцыі сістэм комплекснага кіравання дадзенымі і 1С «Prosto:СКУД», прадстаўленыя РУП «Белтэлекам» манаблокі ТECЛА.

У ходзе агляду экспазіцыі выставы абмяркоўваліся магчымасці практычнага прымянення прадстаўленых распрацовак, асабліва – цэнтра кібербяспекі і шырокафарматных сканераў, у рабоце Нацыянальнага архіва Рэспублікі Беларусь у бліжэйшай перспектыве.

ШФП вытворчасці расійскага брэнда «Кацюша»

Цэнтр кібербяспекі кампаніі «МТС»

Гатовае рашэнне для інтэграцыі сістэм комплекснага кіравання дадзенымі і 1С «Prosto: СКУД»

Манаблокі ТЕСЛА