БДАМЛМ віншуе з Днём Кастрычніцкай рэвалюцыі

Беларускі дзяржаўны архіў-музей літаратуры і мастацтва віншуе ўсіх з Днём Кастрычніцкай рэвалюцыі, якая змяніла ў 1917-м годзе ход гісторыі.

Нягледзячы на глабальныя змены з таго часу, Кастрычніцкая рэвалюцыя і сёння не губляе свайго значэння як знамянальная падзея сусветнай гісторыі. Працягваючы шлях папярэднікаў, якія прайшлі праз самыя розныя выпрабаванні, жадаем сучаснікам захаваць і прымножыць дасягненні мінулага, традыцыі і суверэнітэт.

У рамках такой знамянальнай падзеі прапануем азнаёміцца з творамі на дадзеную тэму і фотаздымкамі беларускіх паэтаў з фондаў БДАМЛМ.

«Верш Мемарыяльныя
дошкі»

Я змераў Мінск і ўпоперак і ўдоўжкі,
Спазнаў усе завулкі, тупікі…
I ўсюды бачу дошкі, дошкі, дошкі,
Прыбітыя, здаецца, на вякі.

Каля адных праходжу ціха міма,
Каля другіх зусім спыняю крок…
Зноў лістапад,
I ноч,
I зноў пад Мінскам
Рэвалюцыйны вее вецярок.

Далёкая
суровая узнёсласць,
Мяне ты хвалявала ўжо не раз.
Вось тут Свярдлоў
Ад Леніна прынёс нам
I праўду,
I параду,
I наказ.

Тут Фрунзе пасылаў свае атрады
Раззброіць жандармерыю,
А там
Узводзілі мінчане барыкады,
Жыццём сваім.
Шлях церабілі нам…

Наўкол гамоніць племя маладое,
Я сёння іх ні ў чым не папракну.
Я ведаю:
Ад нас пяройдзе ўсё ім –
Цяжар жыцця
I праўда пра вайну.

Ад песень і ад смеху гулкі пошчак…
Ды прыйдзе непазбежны сталы час,
I каля гэтых непрыкметных дошчак
Яны яшчэ прыпыняцца не раз.

(П.Панчанка)

«Пад напевамі ветраў асенніх»

Пад напевамі ветраў асенніх,
Над прасцягам разложыстых гоняў
Карнаваліць жыццём вызвалення
Векапомны Кастрычнік сягоння.

I на вогнішчы буры віхрыстай,
На магіле мінуўшчыны дзікай,
Беларусь, над табой агнявіста
Новай квадры настаў маладзік!

Яго погляды – далі люстраныя,
Волі дух – сакаліны палёт,
Яго грудзі – уздым акіяна
Вольнай песняй вітаюць Заход.

Чую – там падымаецца лёскат,
Разліваецца полем аўсяным, –
Гэта звоніць кужэльная вёска,
Да Кастрычніка туліцца ўся.

I глядзіць туды вокам арліным,
Каб узняцца на крыллях вясенніх,
Дзе равуць вольнагучна машыны
Над краінай бяссмертнага Леніна.

Вольных песень стыхійныя хвалі
Вірабурна прыволлем буяняць
I нясуць у замежныя далі
Кліч прыгнечаным – кліч да змагання.

Прыдзе час, і пад снягам чырвоным
Ашлюбуецца з Нёманам Вісла,
свабодаю Вільня зазвоніць, –
Хай панурыя хмары не віснуць!

Пад напевамі ветраў асенніх,
Над прасторам квітнеючых гоняў
Карнаваліць жыццём вызвалення
Векапомны Кастрычнік сягоння.

(П.Трус)

П.Панчанка (BGAMLI_LA_246_1_47_005)

П.Панчанка (BGAMLI_LA_213_1_164_002)

П.Трус (BGAMLI_LA_407_1_233)