Правядзенне сумеснага анлайн-семінара БДАМЛМ і Архіва Прэзідэнта Рэспублікі Казахстан у рамках VII Летняй школы маладых архівістаў

13 чэрвеня 2024 года, у рамках правядзення VII Летняй школы маладых архівістаў «Актуальныя пытанні камплектавання архіваў ва ўмовах лічбавай трансфармацыі» ў г. Алматы, Беларускі дзяржаўны архіў-музей літаратуры і мастацтва (далей — БДАМЛМ) сумесна з Архівам Прэзідэнта Рэспублікі Казахстан арганізавалі анлайн-семінар па пытаннях арганізацыі працы з дакументамі асабістага паходжання.

Мадэратарам семінара з’яўлялася кіраўнік Службы фарміравання архіўнага фонду Архіва Прэзідэнта Рэспублікі Казахстан Гульнара Жумагулаўна Мукажанава.

Дырэктар архіва-музея Алена Аляксандраўна Макаранка выступіла з дакладам «Арганізацыя працы БДАМЛМ з дакументамі асабістага паходжання», у якім падзялілася вопытам працы архіва-музея па камплектаванні, навуковым апісанні, уліку, забеспячэнні захаванасці, стварэнні і развіцці навукова-даведачнага апарата да дакументаў фондаў асабістага паходжання. Асаблівая ўвага была ўдзелена рабоце ўстановы па выкарыстанні дакументаў і іх папулярызацыі сярод дзяцей і моладзі. Выхаванне ў іх беражлівых адносін да дакументальнай спадчыны, якая захоўваецца ў архівах, і павагі да нацыянальнай гісторыі.

Аб ролі і значэнні дакументаў асабістага паходжання як часткі гісторыка-культурнай спадчыны ва ўмовах узрастання інфармацыйнага патэнцыялу выступіла кіраўнік Лісакоўскага рэгіянальнага дзяржаўнага архіва Кастанайскай вобласці Тамаша Бісімбаеўна Мурзабулатава.

Алтынай Саканаўна Баданбекава, кіраўнік аддзела навуковага выкарыстання і публікацыі архіўных дакументаў Дзяржаўнага архіва г. Алматы, свой даклад прысвяціла тэме «Архівы і музеі: новае ў камплектаванні і выкарыстанні фондаў асабістага паходжання».

Арганізацыя семінара дазволіла абмеркаваць шырокае кола праблем у галіне арганізацыі работы з фондамі асабістага паходжання, уключаючы абмен вопытам і інфармацыяй у сферы архіўнай справы Рэспублікі Беларусь і Рэспублікі Казахстан.

1. Дырэктар БДАМЛМ А.А. Макаранка

2. Дырэктар БДАМЛМ А.А. Макаранка падчас сумеснага анлайн-семінара

3. Даклад «Арганізацыя работы БДАМЛМ з дакументамі асабістага паходжання»