Беларуская дэлегацыя прыняла ўдзел у адкрыцці гісторыка-дакументальнай выставы і пасяджэнні Круглага стала “Польска-савецкая вайна 1919-1921 гг. Рыжскі мірны дагавор 1921 г.”
16 сакавіка 2021 г. у Выставачнай зале федэральных архіваў Расійскай Федэрацыі адбылася цырымонія адкрыцця гісторыка-дакументальнай выставы “Польска-савецкая вайна 1919-1921 гг. Рыжскі мірны дагавор 1921 г.”, арганізаванай Федэральным архіўных агенцтвам Расійскай Федэрацыі (далей – Росархіў), Расійскім дзяржаўным архівам сацыяльна-палітычнай гісторыі (далей – РДАСПГ), Расійскім гістарычным таварыствам (далей – РГТ) пры ўдзеле шэрагу федэральных і ведамасных устаноў Расіі, а таксама Дэпартамента па архівах і справаводству Міністэрства юстыцыі Рэспублікі Беларусь (далей – Дэпартамент) і дзяржаўных архіўных устаноў Беларусі. Пасля цырымоніі адкрыцця і агляднай экскурсіі па выставе на базе Расійскага дзяржаўнага архіва старажытных актаў прайшло пасяджэнне круглага стала “Польска-савецкая вайна 1919-1921 гг. Рыжскі мірны дагавор 1921 г.”. У мерапрыемствах прыняла ўдзел беларуская дэлегацыя ў складзе дырэктара Дэпартамента В.І.Кураша і дырэктара Нацыянальнага архіва Рэспублікі Беларусь (далей – НАРБ) А.К.Дземянюка.
У адрас арганізатараў і ўдзельнікаў гісторыка-дакументальнага праекта былі накіраваны прывітанні Прэзідэнта Расійскай Федэрацыі У.У.Пуціна і Міністра замежных спраў Расійскай Федэрацыі С.В.Лаўрова.
На цырымоніі адкрыцця выставы з прывітальным словам выступілі С.Я.Нарышкін (Старшыня РГТ, дырэктар службы знешняй разведкі Расійскай Федэрацыі), В.Р.Мядзінскі (Старшыня Расійскага ваенна-гістарычнага таварыства, памочнік Прэзідэнта Расійскай Федэрацыі), А.М.Арцізоў (кіраўнік Росархіва), В.І.Кураш, П.П.Скараспелаў (дырэктар РДАСПГ).
У сваім выступленні В.І.Кураш акцэнтаваў увагу прысутных на трагічных наступствах польска-савецкай вайны і Рыжскага мірнага дагавора для Беларусі, а таксама адзначыў высокую каштоўнасць міжнародных архіўных праектаў для аб’ектыўнага вывучэння і асэнсавання мінулага.
Беларускім бокам для экспанавання ў рамках выставы было прадстаўлена больш за 100 копій архіўных дакументаў, выяўленых у фондах НАРБ, Беларускага дзяржаўнага архіва-музея літаратуры і мастацтва, Беларускага дзяржаўнага архіва кінафотафонадакументаў, Дзяржаўнага архіва Мінскай вобласці. Выставу суправаджае аднайменны Інтэрнэт-праект, які ўключае паўнатэкставыя электронныя копіі архіўных дакументаў (http://pswar.rusarchives.ru/).
У межах пасяджэння Круглага стала члены беларускай дэлегацыі праінфармавалі ўдзельнікаў аб тэматыка-відавым складзе дакументальных матэрыялаў па тэме, якія захоўваюцца ў фондах дзяржаўных архіваў Беларусі, а таксама пра публікацыйна-выдавецкую і выставачную працу, якая праводзіцца архівістамі на іх аснове. А.К.Дземянюк у сваім выступленні дадаткова спыніўся на найбольш значных і цікавых дакументах з фондаў беларускіх архіваў, якія ўвайшлі ў выставачны праект.
У гэты ж дзень у рамках афіцыйнай праграмы замежнага візіту было арганізавана наведванне беларускай дэлегацыяй Расійскага дзяржаўнага архіва літаратуры і мастацтва (далей – РДАЛМ), падчас якога прайшла аглядная экскурсія па архіве і адбылася сустрэча з дырэктарам РДАЛМ В.А.Шашковой і кіраўнікамі структурных падраздзяленняў, што дазволіла падрабязна азнаёміцца з практычным вопытам калектыву па арганізацыі працэсаў камплектавання, забеспячэння захаванасці і выкарыстання дакументаў асабістага паходжання.
У рамках рабочай сустрэчы з кіраўніцтвам Росархіва быў праведзены аналіз ходу выканання ў 2021 годзе мерапрыемстваў Плана сумесных дзеянняў Дэпартамента па архівах і справаводстве Міністэрства юстыцыі Рэспублікі Беларусь і Федэральнага архіўнага агенцтва Расійскай Федэрацыі на 2020–2022 гады, узгоднены агульныя падыходы ў пытаннях далейшага ўзаемадзеяння і ўдзелу ў мерапрыемствах міжнароднага ўзроўню.
Інфармацыя пра выставу на партале «Архівы Расіі» даступна па спасылцы.