Штабная трэніроўка па абароне супрацоўнікаў і забеспячэнні ўстойлівасці функцыянавання ўстановы праведзена ў Цэнтральнай лабараторыі

У дзяржаўнай установе «Цэнтральная лабараторыя забеспячэння захаванасці дакументаў Нацыянальнага архіўнага фонду Рэспублікі Беларусь» паспяхова праведзена штабная трэніроўка, накіраваная на адпрацоўку прыёмаў і спосабаў абароны супрацоўнікаў, а таксама забеспячэнне ўстойлівасці функцыянавання арганізацыі пры пагрозе ўзнікнення і ўзнікненні надзвычайнай сітуацыі, звязанай з хімічным заражэннем.

Мерапрыемства адбылося ў рамках выканання плана па грамадзянскай абароне і абароне ад надзвычайных сітуацый Партызанскага РАНС. Асноўнай мэтай трэніроўкі стала ўдасканаленне навыкаў персаналу па аператыўным рэагаванні на магчымыя пагрозы, а таксама праверка гатоўнасці ўстановы да дзеянняў ва ўмовах НС.

У ходзе трэніроўкі былі змадэляваныя ўмовы хімічнага заражэння, што запатрабавала ад супрацоўнікаў аператыўнага выканання задач па арганізацыі абвесткі персаналу аб узнікненні надзвычайнай сітуацыі, арганізацыі працы пункта выдачы СІА, правядзенні работ па герметызацыі ЗПП.

Па выніках трэніроўкі, пацверджана гатоўнасць установы да аператыўнага рэагавання на надзвычайныя сітуацыі. Кіраўніцтва лабараторыі адзначыла важнасць рэгулярнага правядзення падобных мерапрыемстваў для падтрымання высокага ўзроўню бяспекі і абароны як супрацоўнікаў, так і архіўных дакументаў.

«Правядзенне штабной трэніроўкі – гэта не толькі праверка нашых магчымасцяў, але і важны крок ва ўмацаванні культуры бяспекі сярод супрацоўнікаў. Мы павінны быць гатовыя да любых сітуацый, каб забяспечыць захаванасць дакументаў Нацыянальнага архіўнага фонду і бяспеку нашых калег», – падкрэсліў дырэктар лабараторыі У.Л.Клюйко.

1. Дырэктар лабараторыі У.Л.Клюйко (злева), намеснік дырэктара С.І.Мязга (у цэнтры) на пастаноўцы задач кіраўнікам структурных падраздзяленняў лабараторыі пры правядзенні штабной трэніроўкі

2. Намеснік дырэктара С.І.Мязга (злева) і вядучы інжынер-тэхнолаг К.М.Цюшкевіч (справа) тлумачаць удзельнікам штабной трэніроўкі парадак дзеянняў пры атрыманні сігналаў «Увага ўсім!», «Хімічная трывога!»

3. Вядучы інжынер-тэхнолаг К.М.Цюшкевіч (на заднім плане) тлумачыць удзельнікам штабной трэніроўкі парадак карыстання процігазам

4. Трэніроўка разгортвання пункта выдачы СІА пры адпрацоўцы ўступнай «Пагроза ўзнікнення хімічнага заражэння»

5. Вядучы інжынер-тэхнолаг К.М.Цюшкевіч (справа) паказвае ўдзельнікам штабной трэніроўкі парадак герметызацыі памяшкання пры хімічным заражэнні